У мальскім садку святкавалі Масленіцу (+відэа)
15:49 / 27.02.2019
Знаёмілі малышоў з народнымі звычаямі, гульнямі і забаўкамі ў школьным этнаграфічным музеі. Дзяцей там сустрэла гаспадыня беларускай хаткі, якая запрасіла сваіх гасцей пачаставацца блінамі ды духмянай гарбатай.
Дарэчы, госці, хоць і маленькія, касцюмы сабе справілі шыкоўныя, адпавядаць святу стараліся: дзяўчынкі і хлопчыкі прыбраліся ў расшытыя беларускім арнаментам сукенкі, фартушкі, кашулькі – і нават пра галаўныя ўборы не забыліся.
І без забаў не абышлося. Чакалі маленькіх гасцей народныя гульні «Зайчык», «Пазнай, чый галасок», «Грушка», разам з гаспадынькай малышы развучвалі танцы і ігралі на беларускіх народных музычных інструментах.
Зоя МАРКУН, выхавальнік Мальскага НПК.
