Запрашае выстава невядомых талентаў
Амаль ніколі не бывае пустым фае дзіцячай школы мастацтваў – тут часта экспаніруюцца карціны юных мастакоў.
Дзеці, чые работы з’яўляюцца на выставах, робяць першыя крокі ў свет выяўленчага мастацтва – але ўжо дэманструюць высокі ўзровень валодання пэндзлем, фарбамі, алоўкамі …і нават пластылінам.
Як расказала педагог мастацкага аддзялення школы Вікторыя Казіміраўна Варановіч, выставы сталі традыцыяй – і пабачыць на іх можна работы не толькі цяперашніх вучняў, але і выпускнікоў.
Зімой і вясной у школе рыхтуюць справаздачныя выставы. І тады пахваліцца сваімі выяўленчымі поспехамі не проста маюць права, а абавязаны ўсе вучні мастацкага аддзялення.
На працягу года карціны юных мастакоў на выставах змяняюць адна адну. Тут ужо можна сустрэць работы удзельнікаў абласных, рэспубліканскіх і нават міжнародных конкурсаў.
Карысна і тое, што вучні, якія рыхтуюць выпускныя работы, на выставах могуць «падгледзець» узровень майстэрства сваіх папярэднікаў.
Але не толькі вучні дзіцячай школы мастацтваў могуць любавацца карцінамі юных мастакоў – выставы адкрыты для ўсіх астраўчан.