Астраўчан запрасілі на тэрыторыю творчасці
На тэрыторыю творчасці запрасілі педагогі і выхаванцы Цэнтра творчасці дзяцей і моладзі ўсіх, хто сябруе з талентам, творчасцю і мастацтвам – выніковае мерапрыемства рэспубліканскага тыдня ўстаноў дадатковай адукацыі прайшло ў суботу ў гарадскім парку.
Песні і танцы, конкурсы і майстар-класы, весялосць, смех і жарты – педагогі цэнтра творчасці спланавалі праграму так, што ў дзяцей была адна праблема: як усюды паспець?
На працягу тыдня цэнтр творчасці працаваў у рэжыме адкрытых дзвярэй: адны педагогі сустракалі дзяцей ў кабінетах цэнтра творчасці, другія самі ішлі ў школы і дэманстравалі майстар-класы па дэкаратыўна-прыкладным мастацтве і творчасці.
У выніку больш за паўтары тысячы дзяцей рознага ўзросту пазнаёміліся з заняткамі па інтарэсах і гурткамі, якія працуюць у Астравецкім цэнтры творчасці дзяцей і моладзі.
Завяршаючым акордам тыдня дадатковай адукацыі стала масавае мерапрыемства ў гарадскім парку.Дзеці і дарослыя ўдзельнічалі ў творчых майстэрнях, спаборніцтвах, гульнёвых праграмах, запальных флэшмобах, тэматычных фотасесіях і бяспройгрышных латарэях.
Адным з цікавых момантаў свята на адкрытым паветры стала работа так званай “кіназалы” – прагляд ролікаў-запрашэнняў, якія рэкламавалі аб’яднанні па інтарэсах, яшчэ раз пацвердзіў, што ў цэнтры творчасці дзеці не сумуюць.
Апошні дзень рэспубліканскага тыдня ўстаноў дадатковай адукацыі дзяцей і моладзі завяршыўся на пазітыўнай ноце. Ён стаў пачаткам крэатыўнай сумеснай працы вялікай сям’і Астравецкага цэнтра творчасці дзяцей і моладзі, якая папоўнілася новымі навучэнцамі.
Ірына МІЛЕШКА, метадыст цэнтра творчасці.