В День памяти воинов-интернационалистов участники Афганской войны вновь собрались вместе
15 лютага адзначаўся Дзень памяці воінаў-інтэрнацыяналістаў. У гэтым годзе споўнілася 25 гадоў вываду савецкіх войск з Афганістана.
Яны звычайна прыходзяць на ўрачыстае мерапрыемства крыху раней вызначанага тэрміну. Тупаюць на прыступках кінаканцэртнай залы “Астравец”, кураць, сустракаюць адзін аднаго моцным поціскам рукі і прывітальным пытаннем: “Як справы?” З некаторымі бачацца толькі ў гэты дзень. Пагаманіўшы хвіліну-дзве, не спяшаючыся, накіроўваюцца ў залу.
Аднак у фае таксама можна затрымацца. Вось ужо другі год работнікі раённага музея арганізоўваюць выставу, прысвечаную Дню памяці воінаў-інтэрнацыяналістаў. Са старых, крыху выцвілых фотаздымкаў паглядаюць і ўсміхаюцца белазубай усмешкай маладыя хлопцы з гарэзлівымі вачыма. “Глянь, дык гэта ж ты!” – “А гэта – я!” – з такім жа юначым задорам згадваюць сябе і каменціруюць фотаздымкі ўдзельнікі афганскай вайны.
Сапраўды, гэта – яны. Толькі пасталелыя на чвэрць стагоддзя, пасівелыя і з ледзь прыкметным болем у вачах…
Пакуль усе збіраліся, на экране ў кінаканцэртнай зале ўзрываліся снарады, мільгалі краявіды Афганістана, гледзячы на якія, удзельнікі вайны ўспаміналі мінулыя падзеі – прысутным дэманстраваўся фільм пра Афганістан.
Першым прывітаць сваіх таварышаў на сцэну падняўся старшыня раённага аб’яднання воінаў-інтэрнацыяналістаў Сцяпан Сцяпанавіч Ціток.
– Дваццаць пяць гадоў назад – так даўно, – вярнуўся ва ўспаміны Сцяпан Сцяпанавіч. – А заплюшчу вочы – здаецца, гэта адбывалася ўчора. З гадамі мы не маладзеем, а дзесьці там, на афганскай зямлі, назаўсёды маладымі засталіся нашы рабяты. Давайце ўшануем іх памяць хвілінай маўчання.
Са словамі шчырай падзякі жывым і ўшанаваннем памяці загінуўшых воінаў-інтэрнацыяналістаў выступілі старшыня раённага Савета дэпутатаў Валерый Вацлававіч Барташэвіч і старшыня раённага Савета ветэранаў Расціслаў Арсенцьевіч Герт.
Ваенны камісар Астравецкага ваенкамата Раман Аляксандравіч Курлоў коратка напомніў падзеі афганскай вайны і нагадаў колькасць нашых суайчыннікаў, якіх яна забрала з сабой. І яшчэ раз падзякаваў за мужнасць і гераізм усім воінам-інтэрнацыяналістам. А таксама ўручыў граматы, памятныя кнігі і дыскі.
А работнікі культуры падрыхтавалі для прысутных канцэрт. Вось так – праз шчырыя і пранікнёныя словы песень – яны ўшанавалі памяць загінуўшых у Афгане і выказалі шчырую павагу да землякоў, якія вярнуліся з той страшнай вайны.
Пасля афіцыйнай часткі ўдзельнікі мерапрыемства едуць да памятнага каменя воінам-інтэрнацыяналістам, каб ушанаваць памяць усіх загінуўшых у пякельным Афгане ўскладаннем кветак і вянкоў і хвілінай маўчання...
А пасля воіны-інтэрнацыяналісты спяшаюцца да сваіх братоў-афганцаў, бо іх назаўсёды парадніла зямля Афганістана – двое нашых землякоў ніколі не прыходзяць на канцэрт, не абменьваюцца скупымі жыццёвымі навінамі: Іосіф Канстовіч і Станіслаў Бялячыц сталі ахвярамі афганскай вайны.
Могілкі ў мястэчку Гудагай і ў Завідзінентах сустракаюць цішынёй. Аднак яна гаворыць гучней за любыя словы. Маўклівае ўскладанне вянкоў і кветак, маўклівыя дотыкі да помніка, запальванне свечак… Лёгкі дымок ад якіх нябачна ўецца высока ў неба. Дзе, хочацца верыць, лунаюць свабодныя ад усяго, у тым ліку – і ад інтэрнацыянальнага абавязку душы нашых загінуўшых хлопцаў…
------------------------------
Марына МАЦКЕВІЧ.