Японская делегация посетила Островетчину
12:23 / 05.03.2017
У панядзелак Астравеччыну наведала дэлегацыя з Мінска, у склад якой увайшлі і госці з Японіі. Пачаткам іх візіту стала сустрэча са старшынёй Астравецкага райвыканкама Ігарам Яраслававічам Шалудзіным.Не першы раз наш раён наведвае японская дэлегацыя – і я рады прывітаць вас на багатай Астравецкай зямлі, – прывітаў шаноўных гасцей старшыня райвыканкама. – Наш раён багаты не толькі прыродай, але і гістарычнымі помнікамі і вядомымі людзьмі, якія тут нарадзіліся ці жылі. Адзін з такіх – Іосіф Гашкевіч.
Ігар Яраслававіч расказаў аб перспектывах развіцця Астравецкага раёна і прапанаваў гасцям некалькі накірункаў для супрацоўніцтва і інвестыцый.
Мы рады, што ваша зямля звязана з імем Іосіфа Гашкевіча, які шмат зрабіў для японскага народа, – адзначыў глава дэлегацыі Сасакі Масаміцу. – Астравец і Хакадатэ маглі б стаць гарадамі-пабрацімамі, бо нас звязваюць культурныя сувязі і асоба Іосіфа Гашкевіча.
Візіт гасцей на Астравеччыну быў звязаны з ушанаваннем памяці Іосіфа Гашкевіча, першага консула ў Японіі, які частку свайго жыцця правёў на Астравеччыне, размова ішла і пра стварэнне гісторыка-культурнага грамадскага аб’яднання “Гаспадар” імя Іосіфа Гашкевіча.У 1995 годзе пры Астравецкім райвыканкаме быў зарэгістраваны фонд імя Гашкевіча. Цяпер мы абмяркоўваеім пытанне аб стварэнні гісторыка-культурнага аб’яднання, якое будзе займацца ўшанаваннем памяці гэтага вялікага чалавека. У гэтым накірунку мы плануем наладзіць цесныя сувязі з Японіяй, Расіяй, Польшай і Літвой – з усімі зацікаўленымі краінамі, якім неабыякавы лёс і спадчына Іосіфа Гашкевіча, – расказаў падчас сустрэчы старшыня аргкамітэта па стварэнні аб’яднання Мікалай Іванавіч Люцко.
У аднаўленні звестак пра Гашкевіча, захаванні яго спадчыны і пашырэнні звестак пра нашага земляка вялікую работу правёў прафесар Адам Восіпавіч Мальдзіс – менавіта ён першым даказаў, што Іосіф Гашкевіч быў беларусам. І падчас сустрэчы Адам Восіпавіч таксама выказаў некалькі прапаноў па даследаванні жыцця і спадчыны нашага земляка.
Пасля сустрэчы ў райвыканкаме госці наведалі месца, дзе ўстаноўлены бюст знакамітаму консулу, які быў ўрачыста ўстаноўлены ў 1994 годзе.
З непадробнай цікавасцю японскія госці выслухалі экскурсаводаў сярэдняй школы №2, якія правялі невялікі экскурс у жыццё “белавалосага консула”, пазнаёміліся з экспазіцыяй школьнага музея і пакінулі запіс у кнізе наведвальнікаў.Наступным пунктам іх маршрута стаў аграгарадок Малі, дзе госці спыніліся каля памятнага знаку Іосіфу Гашкевічу, і пабывалі ў Мальскай бібліятэцы, дзе ўжо шмат гадоў працуе і папаўняецца новымі дакументамі і звесткамі экспазіцыя, прысвечаная вядомаму консулу, які з 1867 па 1875 жыў у маёнтку Малі.
Горад Хакадатэ таксама багаты на гістарычныя помнікі, у нас цудоўна развіваецца турызм. У Астраўцы таксама ёсць, што паглядзець, але асабліва нас цікавіць усё, што звязана з імем Іосіфа Гашкевіча. І мы бачым, што звесткі пра яго зберагаюцца, – расказаў Сасакі Масаміцу.
Апошняй кропкай вандроўкі стала месца ў Малях, дзе, па словах Адама Восіпавіча Мальдзіса, магла б размяшчацца сядзіба Іосіфа Гашкевіча.
Алена ЯРАШЭВІЧ, фота аўтара.
