Делегат на V Всебелорусское народное собрание Галина Карвецкая: "Интересно, как будет развиваться страна, как изменится Островец и какие меры будут приняты, чтобы снизить уровень безработицы"
14:25 / 28.05.2016
Напярэдадні ўсенароднага веча мы папрасілі Галіну Аляксандраўну адказаць на пяць пытанняў аб галоўным.
- Што вы адчулі, калі даведаліся, што ў складзе Астравецкай дэлегацыі паедзеце на V Усебеларускі народны сход?
– Расхвалявалася. Прадстаўляць Астравецкі раён на народным сходзе – вялікая адказнасць.
- Якімі сцежкамі вы прыйшлі ў прафесію?
– Я з дзяцінства люблю жывёлу. Разам з сястрой мы заўсёды дапамагалі маме на ферме – яна працавала даяркай. Бацькі таксама трымалі вялікую гаспадарку, таму работы хапала. Пасля заканчэння 10 класа Астравецкай сярэдняй школы я пайшла працаваць у калгас. Выйшла замуж. Муж Аляксандр працаваў ў калгасе імя Мічурына, старшыня якога выдзеліў нам, маладой сям’і, жыллё, а мне прапанаваў ісці даяркай на ферму ў Германішках. Праз шэсць гадоў я ўзначаліла жывёлагадоўчы цэх.
- У чым сакрэт вялікіх надояў?
– На сённяшні дзень адна ўмоўная карова на МТК “Германішкі” дае 26,6 кілаграмаў малака. А валавы надой з пачатку года склаў больш чым 1 700 тон. На пераапрацоўчае прадпрыемства малако паступае сортам “экстра”. Па надоях малочна-таварны комплекс “Германішкі” трымаецца ў лідарах. Лічу, што вытворчыя поспехі ў першую чаргу залежаць ад калектыву, а потым ужо ад кармавой базы, асаблівасцей утрымання жывёлы. У нас на комплексе падабраўся старанны калектыў. Да справы людзі ставяцца адказна. Даяркі перажываюць і за надоі, і за якасць малака, прафесійна выконваюць свае абавязкі заатэхнік-селекцыянер і ветэрынарны ўрач. Дапамагаюць старшыня СВК “Гудагай” Эдуард Іванавіч Садоўскі і галоўны заатэхнік Віктар Іванавіч Алёкса. Словам – кожны робіць уклад у агульную справу.
- Якія змены адбыліся ў жывёлагадоўлі за гэты час, што вы працуеце?
– Стала значна лягчэй, таму што раней амаль усё рабілі ўручную. Зараз для людзей створаны добрыя ўмовы: на нашым комплексе даяркі могуць прыняць душ, з’есці цёплы абед у пакоі для прыёму ежы. Ёсць пральная машына. Зарплаты па сённяшніх мерках нядрэнныя. Амаль усе работнікі забяспечаны жыллём. Так што скардзіцца грэх.
- Чаго вы чакаеце ад Усебеларускага народнага сходу?
– Думаю, не толькі мне, але і кожнаму чалавеку цікава даведацца, як далей будзе развівацца наша краіна, які курс будзе абраны на бліжэйшыя пяць гадоў, як зменіцца Астравец і раён ў сувязі з будаўніцтвам першай Беларускай АЭС, якія меры будуць прымацца, каб знізіць узровень беспрацоўя…
Веру, што не толькі мы, але нашы дзеці і ўнукі будуць жыць у мірнай Беларусі.