Настаўнікі, вучні і бацькі Гервяцкай школы гулялі ў “Што? Дзе? Калі?”

У суботу ў Гервяцкай СШ інтэлектуальная гульня “Што? Дзе? Калі?” сабрала каманды вучняў “Зёбры”, настаўнікаў “Училки” і бацькоў “Предки” за сталамі знатакоў.

Тры туры, у кожным – па 10 пытанняў з гісторыі і геаграфіі, літаратуры, архітэктуры і іншых галін. На абдумванне – адна хвіліна і бланкі з адказамі перадаваліся журы.

Гульня была дастаткова напружаная: у першым туры перамогу атрымала каманда вучняў, у другім наперад вырваліся настаўнікі, а трэці стаў пераможным для каманды бацькоў.

– Адказваць на пытанні за сталом цікавей, чым назіраць за гульнёй на экране ці ў студыі, – дзеліцца ўражаннямі капітан каманды “Предки” Руслан Анатольевіч. – Калі ты гуляеш, тое, што знаходзіцца па-за сталом, проста не існуе. У цябе ёсць толькі пытанне, хвіліна, каманда – і ўсё. Хочацца, каб такія гульні сталі традыцыяй у Гервяцкай школе.

– Як у добрай сям’і, у нашай камандзе – раўнапраўе. Гуляем мы 6 год, – расказвае капітан каманды “Зёбры”, адзінаццацікласніца Дар’я Жусін. – Тры разы былі пераможцамі раённага чэмпіянату па гульні “Што? Дзе? Калі?”. У нас няма размеркавання па сферах і пытаннях, мы не падслухоўваем абмеркаванне іншых каманд, абапіраемся на свае веды. Сёння гуляць было крыху складана, але мы сабраліся – і толькі на 2 балы адсталі ад каманды бацькоў.

Інтэлектуальная барацьба прынесла шмат станоўчых эмоцый вучням, настаўнікам і бацькам. Усе прадэманстравалі добрыя веды і майстэрства рашэння нестандартных задач. А перамогу святкавалі бацькі.

Таццяна СЫС, настаўнік, кіраўнік аб’яднання па інтарэсах “Інтэлектуалы”.