Прыгоды бычка Боркі і яго гаспадыні
13:00 / 16.09.2021
Трымала яго гаспадыня ў хляве – а Борку, вядома ж, хацелася на волю. Аднойчы жанчына, забыўшыся замкнуць варотцы, пайшла за кормам для гадаванца. Вярнулася з ахапкам травы і бачыць, што яе Борка гарцуе па панадворку. Удыхнуўшы свежага паветра, нібы ап’янеў: падбрыкваў, высока ўскідваючы заднія ногі, толькі хвост мільгацеў, затым падаў на калені і рыў баразну дужымі рагамі ці проста насіўся па кругу.
Борка ўвайшоў у раж – і кабета зразумела, што пад пагрозай яе дагледжаныя градкі і кветнікі. Яна схапіла дубец і паспрабавала загнаць бычка ў хлеў, але яе любімец, апусціўшы галаву долу і пагрозліва чмыхаючы ноздрамі, пайшоў на сваю карміліцу! Жанчына кінула дубец і ледзь паспела схавацца ў хату.
А Борка разышоўся не на жарт: ускочыў на стог сена, складзены пры тарцовай сцяне хлява. Далей – болей: са стажка ён заскочыў на дах. У гаспадыні пахаладзела ў грудзях: зараз бычок праломіць столь – усё ж пад 2 цэнтнеры вымахаў на старанным доглядзе! – ды завісне між дошак… Ці яшчэ горш: упадзе і зламае ногі. У крайнім выпадку расшкамутае страху вострымі рагамі.
Кінулася кабета за дапамогай да суседа. Той пасмяяўся, узяў бізун, залез на страху і прагнаў бычка назад тым жа шляхам, якім ён туды забраўся, а затым зачыніў у хляве.
Пасля таго жанчына хуценька здала гадаванца нарыхтоўшчыкам, каб не нарабіў большай бяды.
А ў вёсцы яшчэ доўга абмяркоўвалі прыгоды Боркі і яго гаспадыні.
Ганна ІВАНОЎСКАЯ