Для каго даярская праца – сямейная справа
10:00 / 10.09.2021
Сёстры
Сёстры Ларыса Гілевіч і Алена Дзямідчык працуюць на комплексе ў Рымдзюнах з першага дня яго ўтварэння – а было гэта каля дзесяці гадоў назад. У адзін голас жанчыны ўспамінаюць, колькі сіл, намаганняў і нерваў каштавала прывучэнне жывёлы да дойкі.
– Перайшлі сюды са старой фермы. Самае складанае ў кожнай справе – гэта пачатак. Нам спатрэбілася каля трох месяцаў, пакуль каровы сталі без праблем заходзіць у даільную залу і спакойна стаяць, – успамінае Ларыса Гілевіч. – Да гэтага часу памятаю радасць ад надоеных намі першых паўтара тысяч тон малака.
– Як кажуць, цяжка першыя сто гадоў, у нашым выпадку – дзён, – усміхаючыся, да размовы далучаецца Алена. – Каровы не слухаліся, брыкаліся – вадзілі іх спачатку па групах. Пачыналі з 20 галоў. За адзін заход цяпер доім 32 галавы, за змену праз нашы рукі тройчы праходзіць больш за 620 галоў.
У дзяцінстве Алена хацела стаць настаўніцай, але не прайшла па конкурсе. А Ларыса вывучылася на трактарыстку, але ніводнага дня па спецыяльнасці не працавала. Па словах жанчын, яны не шкадуюць, што з многіх дарог па волі лёсу ці збегу абставін жыццё іх прывяло ў сельскую гаспадарку.
– Мы расіянкі, нарадзіліся ў Валагодскай вобласці ў шматдзетнай сям’і. У Беларусь я прыехала да знаёмых – мне тут спадабалася. Прыгожая прырода, добразычлівыя людзі… Потым і сястру сюды перацягнула. Яна прыехала да мяне пагасціць, так і засталася, – узгадвае старэйшая з сясцёр Ларыса.
– Жылі спачатку пад Барысавым, але не было ўласнага жылля. Знаёмыя падказалі, што ёсць добры калгас, дзе працаўнікоў ім забяспечваюць. Апошняе і стала рашаючым фактарам пераезду на Астравеччыну, – дадае Алена. – Спачатку тагачасны старшыня калгаса Мечыслаў Лісоўскі прыглядаўся да нас, а потым, відаць, зразумеў, што мы з мужам прыехалі сюды назаўсёды. Нам выдзелілі дом. Праз некаторы час услед за намі ў Астравецкі раён пераехала сястра.
Калі раней на першы план выходзіла колькасць малака, то цяпер значна ўзраслі патрабаванні да яго якасці. Ды і тэхналогія даення змянілася: апрацаваць вымя спецыяльным растворам, здаіць першы струмень малака, прымацаваць даільны апарат, ізноў апрацаваць саскі – гэтыя складаныя на погляд недасведчанага ў даярскай справе чалавека працэдуры аператары машыннага даення робяць за некалькі секунд.
Жанчынам падабаецца графік работы – 2 праз 2 дні, зарплата, нават калі параўноўваць з гарадскімі заробкамі, на комплексе годная.
Аграгарадок Рымдзюны за гэты час стаў другой радзімай для сясцёр. На малочна-таварным комплексе працуе і муж Алены – Анатоль, з якім яны выгадавалі дачку і сына. Ларыса таксама шчаслівая маці: дочкі Мая і Ніна, якая, дарэчы, да дэкрэтнага адпачынку працавала на комплексе заатэхнікам-селекцыянерам, – падарылі ўнукаў.
Напрыканцы размовы, цікаўлюся ў сясцёр, ці не цяжка працаваць у пары блізкім людзям. Ларыса і Алена пераглядваюцца і, не згаворваючыся, у адзін голас адказваюць: не!
– Нават чужыя за гэты час сталі б роднымі, – упэўнены жанчыны.
МТК «Рымдзюны» КСУП «Гервяты» ад іншых адрознівае тое, што дояць кароў тут 2 сямейныя падрады – родныя сёстры Ларыса Гілевіч і Алена Дзямідчык і муж з жонкай Іван і Ганна Праўлуцкія. Дарэчы сказаць, робяць яны гэта па-майстэрску і прафесіянальна: з пачатку года сярэдні надой ад каровы па комплексе складае 5 879 кілаграмаў (+183 кг да аналагічнага перыяду мінулага года).
Неаднаразова гэтыя працаўнікі ўшаноўваліся райкамам прафсаюза работнікаў аграпрамысловага комплексу ў межах акцыі «Наш жывёлавод», а летась па выніках спаборніцтва сярод аператараў машыннага даення комплексаў занялі 3-е месца ў раёне з вынікам 7 115 кілаграмаў малака (+603 кг). Пра шлях у сельскую гаспадарку, працоўныя і хатнія клопаты, планы і мары мы пагутарылі з рымдзюнскімі аператарамі машыннага даення.
Муж і жонка
Іван і Ганна Праўлуцкія ў пары на дойцы працуюць амаль 3 гады. Хоць адну з самых распаўсюджаных у сельскай гаспадарцы прафесій даяркі прынята лічыць жаночай, але на Астравеччыне працуюць у ёй і мужчыны, у тым ліку і Іван.
– Я мясцовая: нарадзілася ў Валэйкунах, гадавалася ў Чэхах, асела ў Рымдзюнах, – з усмешкай гаворыць Ганна. – У кастрычніку будзем адзначаць алавянае вяселле – 17 гадоў разам. Выгадавалі траіх сыноў – Кірыла, Ягора і Аляксея.
– Ганну ведаў, лічы, з дзяцінства. Нашы бацькі добра знаёмыя, але стасавацца з ёй пачалі ўжо на працы, – узгадвае знаёмства з жонкай даяр. – Сустракаліся каля года, потым пабраліся шлюбам. Лічу, што мне з жонкай двойчы пашанцавала: і прыгажуня, і гаспадыня, якіх пашукаць яшчэ трэба. І па характары вясёлая, кампанейская!
Праўлуцкім не замінае, што і на рабоце, і дома яны разам. Наадварот, па словах мужа і жонкі, так зручней планаваць наперад нейкія справы ці выезд у горад.
– Трымаем свіней. Куры былі, пакуль ліса не пагаспадарыла, але абавязкова ізноў завядзём. А кароў хапае на рабоце, – працягвае жанчына. – Ды і часу на сваю рагулю няма: першая дойка на комплексе пачынаецца ў 5 гадзін раніцы.
Цікаўлюся ў мужчыны, як сталася, што ён вырашыў заняцца даярскай справай.
– Мне няцяжка, наадварот, падабаецца, – прызнаецца мужчына. – Я і маці ў дзяцінстве дапамагаў даіць кароў на ферме ў Пугавічах. З малых гадоў прывык да вясковай працы. Быў жывёлаводам, у вольную хвіліну дапамагаў жонцы ў даільнай зале. Відаць, добра атрымлівалася – загадчыца комплекса Любоў Аркадзьеўна прапанавала пастаянна працаваць даяром.
Пытаюся ў Праўлуцкіх, што самае галоўнае ў рабоце аператара машыннага даення.
– Адказнасць і стараннасць, – лічыць жанчына. – Калі на невялікіх малочна-таварных фермах кожная даярка адказвае за сваю групу, то мы працуем за агульны вынік. Пазменна з напарніцамі доім увесь малочны статак.
– І згуртаванасць – а калектыў у нас дружны, і гэта радуе, – дадае Іван Праўлуцкі.
Подписывайтесь на «Островецкую правду» в телеграм по короткой ссылке https://t.me/ostrovetsby.
И присоединяйтесь к нашему сообществу в viber https://vk.cc/c3yHGs – будьте всегда в курсе свежих новостей из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.