Акцыя «Наш жывёлавод» у КСУП «Варняны»: што хвалюе працаўнікоў

11:07 / 16.03.2021

На Астравеччыне працягваецца рэспубліканская акцыя «Наш жывёлавод». За плённую працу ўжо адзначаны лепшыя работнікі комплексаў і ферм КСУП «Гудагай», «Гервяты» і РУП «Астравецкі саўгас «Падольскі». Чарга дайшла і да працаўнікоў КСУП «Варняны», куды ў другой дэкадзе нядаўна з Падзякамі і падарачнымі сертыфікатамі завіталі старшыня прафкама работнікаў аграпрамысловага комплексу Юрый Адула і лідар прафсаюзнай пярвічнай арганізацыі гаспадаркі Таццяна Лісоўская.

Першым пунктам у маршруце значылася малочна-таварная ферма «Карвэлі». Памятаю, напачатку 2019 года таксама ў межах гэтай акцыі работнікі ўзнялі толькі адно пытанне: папрасілі звазіць іх на канцэрт, маўляў, з-за графіка і спецыфікі работы бываць нідзе не даводзіцца.

Да слова сказаць, прафсаюзныя лідары выканалі абяцанне: лепшыя жывёлаводы МТФ «Карвэлі» пабывалі на канцэрце вядомага калектыва «Белыя Росы», які прыязджаў у Астравец.

На гэты раз пытанняў было больш. Жанчыны вельмі пакрыўдзіліся, што ніхто з кіраўніцтва і спецыялістаў сельгаспрадпрыемства не павіншаваў іх з 8 Сакавіка – дарэчы, такія нараканні мы чулі і на іншых фермах і комплексах. Па словах жывёлаводаў, справа не ў падарунках, а ў звычайнай увазе. Юрый Аляксандравіч і Таццяна Эдмундаўна патлумачылі, што, хоць са спазненнем, але гэтая сітуацыя вырашана: ад прафсаюзнай арганізацыі гаспадаркі ў фірменным магазіне сельгаспрадпрыемства ў аграгарадку Варняны кожная працаўніца можа ўзяць свініну. Работнікі таксама цікавіліся парадкам выплат да значных падзей у жыцці і юбілейных дат. Пасля доўгай і, верыцца, плённай размовы для абодвух бакоў надышла чарга віншаванняў. Былі адзначаны аператары машыннага даення Алена Тумаш і Алена Білега.

Алена Білега і Алена Тумаш.jpg

Даяркі МТФ «Карвэлі» Алена Білега і Алена Тумаш


Другі год малочна-таварнай фермай «Варона» загадвае Марыя Грынцэвіч – аксакал жывёлагадоўлі: у розныя часы працавала галоўным заатэхнікам, заатэхнікам-селекцыянерам і не па чутках ведае пра ўсе падводныя камяні жывёлагадоўлі. За гэты кароткі час, дзякуючы намаганням загадчыка, захаванасць цялят на ферме дасягае 100%, больш таго Марыя не цураецца ніякай работы і сама выпойвае малышоў.

Марыя Грынцэвіч і Наталля Яновіч.jpg

Загадчык і аператар машыннага даення МТФ «Варняны» Марыя Грынцэвіч і Наталля Яновіч


Аператар машыннага даення Наталля Яновіч, якая нарадзіла і выхоўвае чацвёра дзяцей, з мясцовых. На ферме ўжо 9 гадоў, а ў сельскагаспадарчым прадпрыемстве і таго больш – 12. Жанчына прызнаецца, што да работы прывыкла, хоць працаваць даводзіцца цяжка – некалькі гадоў назад яна даіла ажно дзве групы кароў.

Малочна-таварны комплекс «Газа» здзівіў чысцінёй і ўтульнасцю. І калектыў тут, відаць, дружны. У многім гэта заслуга загадчыка Генаефы Харкевіч, чый партрэт у 2019 годзе занесены на раённую Дошку гонару. Каля 30 гадоў даяркай на гэтай ферме працуе Ядвіга Чарняк, якая з напарніцай доіць 230 кароў.

Генаефа Харкевіч.jpg

Віншаванні прымае загадчык МТК «Газа» Генаефа Харкевіч


Ядвіга Чарняк.jpg

Тры дзесяцігоддзі кароў у Газе доіць Ядвіга Чарняк


На МТФ «Кярняны» прафсаюзныя лідары адзначылі працу слесара Генадзя Кірпы. У сваю чаргу работнікі паднялі праблему: некалькі тыдняў на комплексе ўзнікаюць перабоі з вадой – з-за гэтага парушаецца рэжым водапаення жывёлы. Юрый Аляксандравіч пераадрасаваў пытанне кіраўніцтву гаспадаркі. Пакуль матэрыял рыхтаваўся да друку, стала вядома, што праблема вырашылася.

Генадзь Кірпа.jpg

Слесар МТК «Кярняны» Генадзь Кірпа 



Ад аўтара

Аб’язджаючы фермы і комплексы розных гаспадарак, мне ёсць з чым параўноўваць. Умовы, у якіх працуюць варнянцы, ні ў якое параўнанне не ідуць з рабочым асяроддзем тых жа гудагайцаў і гервятцаў. Зразумела, што лішніх фінансавых сродкаў у КСУП «Варняны» няма… І людзі гэта цудоўна разумеюць. Ім проста хочацца ўсведамляць, што пра іх памятаюць, іх праца патрэбна, і хоць некалькі разоў на год, на вялікія святы, пачуць добрае слоўца. Яно ж нічога не каштуе…






Подписывайтесь на телеграм-канал «Островецкая правда» по короткой ссылке https://t.me/ostrovetsby.

Телеграм-канал  «Островецкая правда»  – всё самое интересное из жизни Островца и Островецкого района. 

 

 

Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.

Телеграм-канал «Гродно Медиа Group» – это ежедневные новости районов Гродненской области и города Гродно.

Текст:
Фото: Алёна Ганулич