42 тур конкурсу «Пазнай Астравеччыну»
08:13 / 06.11.2020
У спісе гісторыка-культурнай і прыроднай спадчыны ЮНЕСКА Беларусь прадстаўлена Белавежскай пушчай, Мірскім замкам, архітэктурна-культурным комплексам Радзівілаў у Нясвіжы і Дугой Струвэ. Калі тры першыя аб’екты надзвычай папулярныя ў турыстаў з нашай краіны і замежжа, то апошні вядомы мала. Між тым, гэты геадэзічны помнік сусветнага значэння праходзіць праз 10 краін Еўропы, у тым ліку і Беларусь, а два яго пункты знаходзяцца на Астравеччыне, паблізу вёсак Кандраты і Некрашуны.
З 1816 па 1852 год пад кіраўніцтвам вядомага расійскага астранома Васіля Струвэ было праведзена маштабнае градуснае вымярэнне дугі мерыдыянаў працягласцю 25 градусаў 20 хвілін, або 2 880 кіламетраў. На той час яно з’яўлялася самым буйным у свеце даследаваннем формы і дакладных памераў Зямлі.
Дуга Струвэ пачынаецца з пункта «Фугленес» на беразе Ледавітага акіяна і доўжыцца да пункта «Старая Някрасаўка» ў вусці Дуная на беразе Чорнага мора. На гэтым прамежку закладзены 265 геадэзічных пунктаў, над якімі былі пабудаваны «сігналы» – трывалыя вышкі для правядзення назіранняў.
На тэрыторыі Беларусі ў першай палове 19-га стагоддзя закладзены 31 геадэзічны пункт Дугі Струвэ. Самы «растыражыраваны» – «Тупішкі» каля старажытных Гальшан у суседнім Ашмянскім раёне.
Астравецкі пункт «Конрады» мае некалькі каштоўных адметнасцяў. Напачатку 21 стагоддзя менавіта ад яго пачалося аднаўленне месца размяшчэння ўсіх астатніх пунктаў Дугі Струвэ на Беларусі. Яго месцазнаходжанне першапачаткова пазначалася: Віленскі павет, паблізу засценка Камароўшчына.
Потым яго «прывязалі» да паселішча Конрады, якія сёння вядомы як Кандраты ў Гудагайскім сельскім Савеце.
У 2014 годзе мясцовыя краязнаўцы Алесь Юркойць і Дзмітрый Дамарад знайшлі гэты пункт Дугі Струвэ паблізу ўжо апусцелых Кандратоў – пра гэта пісала «Астравецкая праўда». Ён знаходзіцца на высокім пагорку пад трайной металічнай вежай-«матрошкай». А ў 2015 годзе усё той жа няўрымслівы Дзмітрый Дамарад адшукаў яшчэ адзін пункт Дугі Струвэ на Астравеччыне паблізу вёскі Некрашуны.
Знешне геадэзічны пункт уяўляе сабой каменны бетонны куб памерам 2х2 метры з выбітым адметным крыжам.
Правільныя адказы на пытанне далі Кацярына Вараб’ёва – 1 бал, Андрэй Ваўчок – 2, Вікторыя Іванцэвіч, Жанна Волк-Леановіч, Алег Драган, Алена Памецька, Ганна Мілашэвіч, Марына Кімса – па 4 балы.
Змяненняў у тройку лідараў і гэты тур не прынёс: Алег Драган – 142 балы, Марына Кімса – 140, Жанна Волк-Леановіч і Ганна Мілашэвіч – па 136.
Дзе гэта, што гэта?
Нагадваем: далучыцца да конкурсу «Пазнай Астравеччыну» можна з любога этапу. Калі вы ведаеце, дзе гэта і што гэта, – дасылайце свае адказы, расповеды, фотаздымкі і відэа.
Адказы на пытанні конкурсу можна дасылаць у рэдакцыю па электроннай пошце ці паведамляць па тэлефонах 2-03-64, 7-08-44, +375-29-328-75-99 на працягу пяці дзён (з улікам выхадных і святочных) пасля выхаду газеты з конкурсным заданнем (да аўторка ўключна).
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
