Пра здабыткі і развіццё Астравецкага лясгаса расказвае яго дырэктар Рыгор Долгі
10:04 / 19.09.2020
– Сёлета ўпершыню на раённую Дошку гонару былі занесены прадпрыемствы, сярод якіх Астравецкі лясгас. Для вас гэта стала нечаканасцю?
– Для нас гэта было прыемнай нечаканасцю. Работнікі Астравецкага лясгаса і лясніцтваў заносіліся на раённую Дошку гонару, тут варта прыгадаць ляснічага Катлоўскага лясніцтва Аляксея Мазырку, машыніста трылёвачнай машыны Паўла Афоніна і іншых. Таксама нядаўна стала вядома, што лясгасу прысвоены статус «вопытны».
– Некалькі гадоў запар ваша лесагаспадарчае прадпрыемства лідзіруе сярод іншых лясгасаў вобласці ў спаборніцтве па сацыяльна-эканамічным развіцці. Раскрыйце сакрэты поспеху.
– Сапраўды, у спаборніцтве сярод лясгасаў вобласці ў 2018-2019 гадах і за 6 месяцаў гэтага года мы лідары. Пры падвядзенні вынікаў улічваюцца многія фактары, ад інвестыцый у вытворчасць і лясной дзейнасці – вырошчванне пасадачнага матэрыялу, догляд за лесам – да аховы лесу ад пажараў. Штогод мы выконваем усе планавыя паказчыкі. Нарошчваюцца аб’ёмы вытворчасці – расце і заработная плата.
– Які з накірункаў дзейнасці прыносіць найбольшы прыбытак?
– Астравецкі лясгас – комплексная гаспадарка: спектр накірункаў дзейнасці дастаткова шырокі.
У апошнія гады да 60% ад усёй выручкі прыносіць дрэваапрацоўчы цэх, які створаны на базе былога сумеснага беларуска-польскага прадпрыемства «Лесполь». Касцяк калектыву захаваўся з таго часу.
Вытворчасць пастаянна мадэрнізуецца: спачатку набылі лінію «Лармет», потым арганізавалі лесасушыльную гаспадарку, купілі дзве камеры і абсталяванне для зрошчвання драўніны, другую лінію «Лармет», асвоілі выпуск паліўных брыкетаў. Напрыканцы мінулага года ўвялі ў эксплуатацыю лінію па сартаванні драўніны, што дазволіла сарціраваць да 500 кубоў за змену – гэта павялічыла выпуск гатовых піламатэрыялаў… Словам, дрэваапрацоўка развіваецца. Укараненне новай сістэмы ўліку драўніны дазволіць зрабіць працэс яе нарыхтоўкі цалкам празрыстым.
Летась лесагадавальная гаспадарка прынесла лясгасу 205 тысяч рублёў. Напрыклад, лесагадавальнік некалькі гадоў запар уваходзіць у лік 15 лепшых у Беларусі і атрымлівае званне «ўзорнага».
– Некаторыя выказваюць меркаванне, што лясоў больш высякаецца, чым садзіцца…
– Гэта не так. Летась мы першы год працавалі па новым праекце лесаўпарадкавання. Спецыялісты-таксатары з «Белдзяржлесу» правялі інвентарызацыю насаджэнняў і вызначылі на бліжэйшыя 10 гадоў планавыя паказчыкі для работы. Гэта даследванне паказала, што разліковыя лесасекі павялічыліся ў 2 разы – гэта значыць, што працэнт спелых лясоў павялічыўся. Летась работы па лесааднаўленні выкананы на 438 гектарах – гэта 161% у параўнанні з 2018 годам.
– Колькі драўніны нарыхтоўваецца механізаваным спосабам, і ці дастаткова ў лясгасе тэхнікі? Наколькі мне вядома, пад гэтыя мэты некалькі гадоў назад было створана асобнае падраздзяленне?
– Летась было нарыхтавана 206,5 тысяч кубаметраў драўніны, больш за палову – з дапамогай шматаперацыйнай тэхнікі.
У апошнія гады былі нараканні, што лясная гаспадарка шмат увагі надае нарыхтоўцы драўніны, менш – якасці вырошчваемых лясных культур. Маўляў, леснікі ў большай ступені займаюцца прамысловай дзейнасцю. Мінлесхозам было прынята рашэнне аб стварэнні лесапунктаў – падраздзяленняў лясгасаў, якія будуць спецыялізавацца на нарыхтоўцы драўніны. «Перавялі» туды лесанарыхтоўчую тэхніку і брыгаду. Сёння ў нас працуюць па 4 харвэстары, адзін новы, і фарвардары, на падвозе людзей і паліва задзейнічаны 3 аўтамабілі УАЗ.
– Дрэваапрацоўчы цэх і лесапункт, якія размешчаны ў Астраўцы, можна пракантраляваць у любы момант. А як наладжана работа з лясніцтвамі?
– У Астравецкім лясгасе 9 лясніцтваў. Мае стасункі з падначаленымі трымаюцца на даверы. З ляснічымі мы рэгулярна сустракаемся, падводзім вынікі работы, абмяркоўваем праблемы і разам шукаем выйсце. Толькі работа ў камандзе можа прывесці да станоўчых вынікаў.
– Ці паўплывала на развіццё паляўнічай гаспадаркі эпідэмічная сітуацыя?
– Паляўнічая гаспадарка – адзін з самых перспектыўных накірункаў дзейнасці лясгаса – штогод займала лідзіруючыя пазіцыі ў вобласці і рэспубліцы. У 2018 годзе мы атрымалі найбольшую выручку сярод лясгасаў вобласці ад арганізацыі паляўнічых тураў. Эпідэмія каронавіруса негатыўна паўплывала на гэта – экспарт паляўнічых паслуг значна знізіўся ў параўнанні з мінулым годам. Спадзяёмся, што ў хуткім часе сітуацыя стабілізуецца і аматары палявання з-за мяжы зноў прыедуць да нас – у гэтым накірунку шчыльна працуе вядучы паляўніцтвазнаўца Віктар Урбановіч.
Адны з першых у краіне мы пабудавалі вальеры для аднаўлення папуляцыі высакароднага аленя, потым завезлі ланяў, аленяў плямістых, муфлонаў. Пазней выпусцілі ў дзікую прыроду некалькі дзясяткаў высакародных аленяў – у выніку сфарміравалася нядрэнная папуляцыя. Калі некалькі гадоў назад даходы ў многіх лясгасах падалі з-за сітуацыі з афрыканскай чумой, то дзякуючы нашай вальернай гаспадарцы мы, наадварот, зрабілі значны крок наперад – з дзіка перапрафіліраваліся на іншыя паляўнічыя віды.
Вальеры даюць нам магчымасць займацца развядзеннем маладняку і продажам жывёл.
– Сёлетні год выдаўся багатым на грыбы: толькі лянівы не папоўніў запасы на зіму. Сярод людзей ходзяць чуткі аб уводзе аплаты за збор лясных дароў. Рыгор Мечыслававіч, абвергніце гэта ці пацвердзіце?
– Людзі могуць не хвалявацца і спаць спакойна: увядзенне аплаты за збор ягадаў ці грыбоў не плануецца. Хочацца астраўчанам і гасцям горада яшчэ раз нагадаць, каб, выпраўляючыся ў лес, вялі сябе там цывілізавана і не пакідалі пасля сябе смецце.
– Якія планы і мэты ставіце на бліжэйшы час перад сабой і сваёй камандай?
– Каб людзі добра працавалі, трэба стварыць для гэтага ўсе ўмовы. Мы клапоцімся пра сваіх работнікаў. Сёлета Астравецкае лясніцтва пасля рамонту пераехала ў былы адміністрацыйны будынак лясгаса.
Былыя канторы Астравецкага і Гервяцкага лясніцтваў адвядзём пад службовае жыллё для нашых работнікаў. У планах – далейшая мадэрнізацыя дрэваапрацоўкі. Хочам рэалізоўваць прадукцыю лесапілавання не толькі ў цэху, але і на іншых пляцоўках. Пастаянна патрабуецца абнаўленне лесавознага парку: штогод мы стараемся набываць адну-дзве машыны. Па адным аўтамабілі для падвозу людзей сёлета з’явілася ў Палушскім лясніцтве і для брыгады па падрыхтоўцы лесфонду. Спадзяюся, у нас атрымаецца аднавіць узровень, які быў да COVID-19, нашай паляўнічай гаспадаркі. Значную ўвагу будзем і надалей надаваць развіццю турызму, у тым ліку і экалагічнаму, а таксама пажарнай бяспецы. У наступным годзе запланавана ўкараненне праграмы «Лясны страж», што дазволіць займацца адсочваннем пажарнай сітуацыі ў лясным фондзе аднаму чалавеку.
– Дзякуй за гутарку! З надыходзячым святам – няхай усё задуманае збываецца!
Подписывайтесь на телеграм-канал «Островецкая правда» по короткой ссылке https://t.me/ostrovetsby.
Телеграм-канал «Островецкая правда» – всё самое интересное из жизни Островца и Островецкого района.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.