Дзе астраўчане куплялі адзенне і канцтавары да школы
08:53 / 21.08.2020
Інэса Багдановіч, настаўнік пачатковых класаў Варнянскага НПК:
– Дачка пойдзе ў 10 клас. На дзяўчынку-падлетка праблематычна падабраць адзенне дзелавога стылю ў Астраўцы, таму выправіліся ў адзін са сталічных гандлёвых дамоў – балазе, выбар уражвае. Канцылярыю набывалі праз інтэрнэт-магазін: на «настаўнік.бай» заказвала дапаможнікі, там жа «паклала» ў кошык і школьныя прыналежнасці.
Юлія Локцік, загадчык дзіцячага сада №1 г. Астраўца:
– З мужам выхоўваем дваіх дзетак: Віялета пойдзе ў 10 клас, а Яраслаў у 4-ты. Збіраць дзяцей у школу будзем у Мінску: дачка ўжо сама зможа выбраць адзенне на свой густ, а вось сыну давядзецца дапамагчы. (Усміхаецца.) Там жа плануем купіць сшыткі, ручкі, алоўкі і іншыя дробязі. Дарэчы, штогод апранаем дзяцей у школу ў сталіцы – на жаль, у Астраўцы невялікі выбар адзення дзелавога стылю, асабліва на падлеткаў.
Наталля Алешчанка, повар Спондаўскага НПК, з дачкой Ангелінай:
– Я ў адпачынку, таму прыехалі з дачкой у Астравец, каб набыць неабходнае ў школу. У «Талеры» купілі штаны і гольф, на рынку – туфлі. За год дачушка вырасла нямоцна, таму сёлета не трэба было купляць сарафан.
Ангеліна:
– Сшыткі і ручкі я выбірала сама!
Дзмітрый Чэрнышаў, вучань СШ №3 г. Астраўца:
– Не паверыце, але вельмі хачу ў школу! З-за сітуацыі з каронавірусам апошнія два месяцы навучальнага года займаліся дыстанцыйна (настаўнікі нам прысылалі заданні), плюс летнія канікулы – я ўжо здоўжыўся па сябрах і аднакласніках. Касцюм мне заказвалі ў адным з інтэрнэт-магазінаў, а неабходную канцылярыю набывалі ў мясцовым «Карандашы».
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.