Дзесяць слоў пра Астравец
Кожны горад па-свойму ўнікальны: гісторыя, традыцыі, знакамітыя людзі, мясціны – тое, што вылучае яго сярод іншых. Для таго, каб адкрыць астравецкія таямніцы, мы падабралі дзесяць слоў, якія дапамогуць даведацца пра наш горад.
Гаштольды. У пісьмовых крыніцах Астравец упершыню згадваецца ў 1468 годзе, калі магнаты Гаштольды ахвяравалі дзве бочкі мёду парафіяльнаму касцёлу Дзевы Марыі і Усіх Святых, цяпер вядомы як касцёл Космы і Даміяна. Дарэчы, гэты храм з’яўляецца выдатным помнікам архітэктуры класіцызму з рысамі барока.
Востраў. Гэтае слова хаваецца ў самой назве горада, які бярэ свой пачатак ад умацаванага вострава на правым беразе ракі Лоша, што працякае праз увесь Астравец. Цікавым з’яўляецца той факт, што амаль у самым яго цэнтры на рацэ, дзякую чы астравецкім уладам, абуладкаваны невялічкі, як яго называюць самі жыхары, востраў кахання. Такую назву востраў атрымаў таму, што стаў любімым месцам маладажонаў, якія пакідаюць тут сімвал свайго кахання – замочак – на парэнчы маста.
Стронга. Гэтая рыба адлюстравана на гербе Астраўца. Раней у Лошы вадзілася шмат стронгі, але з цягам часу яна пачала знікаць. Дарэчы, рыба – раннехрысціянскі сімвал, звязаны з урадлівасцю, здзяйсненнем жаданняў і справядлівасцю.
Дуб. На Астравеччыне дубоў заўсёды было вельмі шмат. І наш горад не выключэнне. Гэтыя магутныя дрэвы маюць асаблівае, амаль сакральнае значэнне для горада і раёна.
Дарэчы, гэтае дрэва таксама адлюстравана на гербе Астраўца. Дуб увасабляе моц, вынослівасць, даўгалецце, высакароднасць, а таксама славу.
Поўнач. Астравецкі раён самы паўночны з рэгіёнаў Гродзенскай вобласці. Разам з Ашмянскім і Смаргонскім складае так званы паўночны вектар Гродзеншчыны.
Пабожнасць. У раёне зарэгістравана 18 рэлігійных абшчын: 13 каталіцкіх, 4 праваслаўных, 1 – хрысціян веры евангельскай. Восем культавых будынкаў Астравеччыны прадстаўляюць гістарычную каштоўнасць і маюць статус помнікаў архітэктуры.
Гашкевіч. Прозвішча Гашкевіча выбіта залатымі літарамі ў гісторыі Астраўца і раёна. Іосіф Гашкевіч – расійскі лінгвіст, усходазнавец, першы дыпламатычны прадстаўнік Расійскай імперыі ў Японіі – апошнія гады свайго жыцця правёў на Астравеччыне ў аграгарадку Малі.
У цэнтры горада стаіць бронзавы бюст Гашкевіча. Ёсць памятны знак і на гарадской вуліцы, названай у гонар Гашкевіча.
Працавітасць. Астравец – горад працавітых людзей, якія выконваюць сваю працу на 100 працэнтаў. І сведчанне таму шматлікія ўзнагароды, якімі наш горад і яго людзі адзначаны ў апошнія гады.
АЭС. Не толькі ў Беларусі, але і за мяжой ведаюць, што на Астравеччыне будуецца першая ў гісторыі нашай краіны атамная электрастанцыя. Менавіта дзякуючы будаўніцтву Беларускай АЭС Астравец стаў адным з самых маладых і прыгожых гарадоў краіны.
Дом. Для кожнага з нас домам лічыцца месца, дзе нарадзіўся, таму родны Астравец заўсёды застанецца для мяне тым месцам, куды я буду вяртацца зноў і зноў.
Падрыхтавала Вераніка САКОВІЧ.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup
Телеграм-канал «Гродно Медиа Group» - это ежедневные новости районов Гродненской области и города Гродно.