Хлебаробы Астравеччыны прыступілі да жніва
16:38 / 16.07.2020
Усе гаспадаркі раёна прыступілі да ўборкі рапсу. На раніцу 16 ліпеня было зжата 75 гектараў, намалочана 202 тоны.
З пачынам, хлебаробы! Няхай сёлетняе жніво будзе лёгкім, а галоўнае – плённым!
Вы адчуваеце, чым пахне ў паветры?
Скажаце, тонкім водарам элегантных руж, што выйшлі на праменад перад гасцініцай Sun Hotel? Разагрэтым пяском на Янаўскім вадасховішчы?
Свежасцю прамытага кароткім навальнічным дажджом лесу?
Так, усё гэта, як кажуць, мае месца быць.
Але ўжо з’явіліся ў паветры ледзь чутныя, амаль няўлоўныя ноткі водару даспяваючай збажыны, на які пацягнуліся з усіх бакоў чырвананогія землямеры-буслы. Яшчэ дзень-два – і саспее жніво, запалоніць наваколле сваім ні з чым не параўнальным і найгалоўнейшым у свеце водарам хлеба; завуркоча рухавікамі камбайнаў, зашэпча струменямі збажыны, што пасыплецца з бункера ў распрасцёртае ўлонне аўтамашын, стане важка ўздыхаць у чэраве зернесушылак шматтонным ураджаем…
Усё гэта будзе заўтра. А сёння, калі жніво толькі пачынае ўплятаць свае ноткі ў шматаблічную палітру гукаў і пахаў наваколля, мы пацікавіліся ў спецыялістаў раённага ўпраўлення сельскай гаспадаркі і харчавання і прафсаюзнага лідара справамі будзённымі: які фронт работ трэба выканаць, хто гэтым будзе займацца, якія існуюць праблемы, як заахвоцяць лепшых.
Ураджай палічым у засеках
Міхаіл Шлыковіч, загадчык сектара раслінаводства:
– Нам сёлета трэба ўбраць 17 377 гектараў збожжавых і зернебабовых – гэта без уліку кукурузы, з іх 2 577 гектараў азімага рапсу, 210 – грэчкі. Віды на ўраджай нядрэнныя, добра выглядаюць і азімыя, і яравыя, але збожжа трэба важыць, калі яно ўжо ў засеках ляжыць, а не ў коласе стаіць, таму пакуль ад прагнозаў давайце ўстрымаемся. Хоць, зрэшты, КСУП «Гудагай» ужо абмалаціў першыя 75 гектараў азімага ячменю, намалаціўшы з кожнага па 54,7 цэнтнера – нядрэнны вынік. Некаторыя гаспадаркі ўжо прыступілі да ўборкі азімага рапсу.
На жніве будзе задзейнічана 57 камбайнаў. Найбольшая нагрузка будзе ў КСУП «Міхалішкі» і саўгасе «Падольскі» – па 357 і 350 гектараў на камбайн адпаведна. Але, думаю, усе гаспадаркі паспяхова справяцца з задачай: убяром ураджай у аптымальныя тэрміны і без страт.
На дапамогу вяскоўцам прыйдуць гараджане
Рэната Яфімава, галоўны інжынер:
– Гатоўнасць збожжаўборачных камбайнаў на 13 ліпеня складала 91 працэнт. У КСУП «Гудагай» і Гервяты» яны падрыхтаваны поўнасцю, ёсць пэўныя праблемы ў «Варнянах», «Міхалішках» і саўгасе «Падольскім». Праўда, апошні на днях атрымаў два новыя камбайны КЗС-1218, так што праблем, думаю, там не ўзнікне. Увогуле да 18 ліпеня практычна ўся збожжаўборачная тэхніка будзе адрамантавана.
Няма вялікіх пытанняў і з гатоўнасцю збожжасушыльных комплексаў.
Што тычыцца механізатараў, то тут дапамогу сельгаспрадпрыемствам аказваюць арганізацыі раёна. Так, камбайнавы экіпаж з райсельгастэхнікі будзе працаваць у КСУП «Варняны», 5 работнікаў БелАЭС, РАНС і РУП ЖКГ прыйшлі на дапамогу на час жніва хлебаробам КСУП «Гудагай», па 3 гарадскія памочнікі падчас жніва прыняты на работу ў КСУП «Міхалішкі» і саўгас «Падольскі».
Арганізацыі раёна – райсельгастэхніка, ДЛГУ «Астравецкі лясгас», ДРБУ-159, РУП ЖКГ і іншыя выдзелілі транспарт – трактары, МАЗы – для адвозкі збожжа.
Вядома, тэхніцы ўласціва ламацца – але спадзяёмся, што істотных збояў у рытме жніва з-за прастояў камбайнаў і машын не ўзнікне, усе праблемныя пытанні мы пастараліся закрыць.
Лепшыя атрымаюць падарункі
Юрый Адула, старшыня райкама прафсаюза работнікаў аграпрамысловага комплексу:
Традыцыйна прафсаюз арганізоўвае спаборніцтва на жніве, пераможцы яго будуць адзначаны падарункамі.
Так, абласная прафсаюзная арганізацыя ўзнагародзіць тры камбайнавыя экіпажы, якія першымі намалоцяць тысячу тон збожжа на камбайнах з прапускной здольнасцю да 10 кілаграмаў у секунду, 10-12 і звыш 12 кілаграмаў.
Раённы камітэт адзначыць 5 першых экіпажаў-тысячнікаў незалежна ад таго, на камбайнах якой магутнасці яны працуюць, а таксама маладзёжны экіпаж, які першым намалоціць тысячу тон, 6 вадзіцеляў, якія першымі перавязуць тысячу тон, 5 брыгад збожжасушыльных комплексаў, якія першымі перасушаць 2 тысячы тон. Будзе адзначаны таксама галоўны аграном гаспадаркі, якая першай перасягне тысячны намалот.
Узнагароджваць пераможцаў спаборніцтва будзем у дзень дасягнення імі пераможнага выніку непасрэдна на рабочым месцы.
Райкам прафсаюза штодзённа праводзіць улік па кожным удзельніку ўборачнай кампаніі – вынікі яго можна ўбачыць на нашым сайце.
Раённы выканаўчы камітэт таксама традыцыйна аб’яўляе спаборніцтва за дасягненне лепшых вынікаў у вырошчванні збожжавых культур і на жніве, пераможцы якога будуць вызначаны і ўзнагароджаны пасля заканчэння ўборачнай кампаніі.
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.
