О Великой Победе дети рассказали в красках и словах
Дзеці з Расіі, Беларусі, Арменіі, Малдовы, Узбекістана, Казахстана і Кыргызстана ўдзельнічалі ў міжнародным інтэрнэт-конкурсе творчых работ «Мы – наследники Победы». Шмат дыпламантаў конкурсу было з нашай краіны, а ў Астравецкі раён прыйшло шэсць дыпломаў.
Міжнародны інтэрнэт-конкурс творчых работ арганізавалі выдавецтва «Мастацкая літаратура» з беларускага боку і ТАА «Знанио» з расійскага.
Да ўдзелу ў конкурсе запрасілі школьнікаў пачатковых класаў. Яны маглі даслаць малюнак альбо літаратурную работу, прычым пісаць можна было на любой мове. Тэматыку не абмежавалі толькі Перамогай – дзецям яшчэ прапанавалі расказаць пра ветэранаў, мір на Зямлі, сяброўства, шчасце і лад у сям’і.
У накірунку «Выяўленчае мастацтва» ўдзельнічала амаль тры тысячы малюнкаў – і адным з прызёраў з работай «Брацік, вось так змагаўся наш прадзед» (на фота) стала навучэнка Астравецкага ЦТДіМ Паліна Мацкевіч. У яе Дыплом ІІІ ступені.
Накірунак «Літаратурная творчасць» быў менш шматлікім – сюды даслалі крыху больш за тысячу работ. Годна прадставілі Астравеччыну і пачаткоўцы. Якаў Канчанін з Кямелішкаўскага НПК расказаў пра шчаслівае дзяцінства, якога не было б без тых, хто заваяваў Перамогу, – і «ўзяў» другое месца. Вучаніца астравецкай СШ №1 Юлія Гайдановіч за работу «Памяць» узнагароджана Дыпломам ІІІ ступені. Такую ж узнагароду атрымаў Уладзіслаў Казакевіч з Гервяцкай СШ за гісторыю пра сяброўства. Два прызавых месцы прынеслі Варнянскаму НПК вершы Сафіі Багушэвіч «У міры жывіце» і Аніты Юркойць «Каляровы сон» – яны ўзнагароджаны Дыпломамі І і ІІ ступеняў.
Па выніках конкурсу будзе складзены электронны зборнік работ, куды ўвойдуць творы пераможцаў і прызёраў. Яго можна будзе спампаваць пасля 1 мая на адукацыйным партале «Знанио».
У міры жывіце!
Сонейка свеціць на нашай планеце.
У міры растуць беларускія дзеці.
Толькі ў фільмах бачаць вайну,
Якая Радзіме прынесла бяду.
Толькі з расказаў сівых ветэранаў
Ведаюць дзеці пра боль і пра раны.
Слухаюць ціха аб жорсткіх баях,
Сэрца сціскаецца, слёзы ў вачах…
Людзі змагаліся, верай жылі!
Людзі не здрадзілі роднай зямлі!
Жудасна плачуць Хатыні званы…
Ведаюць дзеці: не трэба вайны!
Сонейка, ззяй жа на нашай планеце!
У міры жывіце, шчаслівыя дзеці!
Свята! Салюты! 9 Мая!
Дзень Перамогі мы адзначаем!
Сафія Багушэвіч
Каляровы сон
Пра нашу Беларусь у сне
Цікава фарбы расказалі мне.
На белы ліст яны ляглі –
Малюнкі раптам ажылі.
Жудаснай вайны хвіліны,
Боль і плач маёй краіны
Паказала відавоч
Фарба чорная, як ноч.
Палаюць вёскі, гарады…
Чырвоны колер – знак бяды.
Колькі гора, смутку, слёз
Вораг на зямлю прынёс!
Светам жоўта-залатым
Сонца разагнала дым.
Мірнае жыццё ідзе,
Усё красуе і цвіце!
Кроплі блакіту малююць узор:
Ззянне нябёсаў, хвалі азёр.
Зялёная фарба навокал упала,
Лясы Беларусі мне паказала.
Яркія колеры ў сон мой прыйшлі,
Месца падзеям шчаслівым знайшлі.
Зямля, прыгажэй з году ў год!
Вясёлка, вядзі за сабой карагод!
Як добра прачнуцца, самой маляваць,
Фарбай вясёлай карціны ствараць.
Чорную фарбу я не вазьму,
Памятаць толькі буду вайну.
Аніта Юркойць
Подписывайтесь на телеграм-канал «Гродно Медиа Group» по короткой ссылке t.me/GrodnoMediaGroup.
Телеграм-канал «Гродно Медиа Group» – это ежедневные новости районов Гродненской области и города Гродно.