Цяпло сяброўскіх сэрцаў
12:07 / 18.01.2020
Пачалася сустрэча з прэзентацыі аматарскага аб’яднання «Землякі», створанага намаганнямі ўсё той жа няўрымслівай Людмілы Іванаўны. Яна згуртавала вакол сябе паважаных аднавяскоўцаў – працаўнікоў, ветэранаў, умельцаў і творчых людзей. Вось яны за святочным сталом: Таццяна Нікіфараўна Волкава, настаўніца з вялікім стажам, пакутніца ў фашысцкай няволі падчас Вялікай Айчыннай вайны; Тарэса Станіславаўна Ляховіч, мнагадзетная маці, сярод яе дзетак – знакаміты спартсмен-лёгкаатлет Аляксандр Ляховіч, Тамара Рамуальдаўна Пятрова, настаўніца фізічнай культуры, вялікая аматарка прыроды і падарожжаў; Лідзія Аляксандраўна Лакевіч, біёлаг, заўзяты кветкавод і спраўная гаспадыня; Марыя Вікенцьеўна Сальмановіч, жанчына вельмі міласэрная, дапамагае ўсім, хто слабейшы, да таго ж, актыўная ўдзельніца розных клубных імпрэз; Марыя Іванаўна і Уладзіслаў Уладзіслававіч Александровічы, былыя бібліятэкар і калгасны шафёр; Ірына Генрыхаўна Масейка, аграном-насеннявод і, зразумела, вялікая шанавальніца расліннага свету, Люся Уладзіславаўна Міхна, настаўніца рускай мовы і літаратуры, шчыры сябар кніг; Жанна Іванаўна Лоўкіс, стваральніца сапраўдных вышытых і вязаных шэдэўраў; паэткі Таццяна Зянонаўна Раткевіч, Святлана Васільеўна Еўтушэнка... Словам, «Землякі» – гэта згуртаванае, цеснае брацтва, у якім кожны адчувае сябе ўпэўнена, куды хоча вяртацца з блізкіх і далёкіх дарог.
Удзельнікі клуба «Землякі»
Каб раззадорыць усіх, Людміла Іванаўна задала некалькі дасціпных і даволі складаных загадак.
Людміла Кухарэвіч
Запальваюцца святочныя раждзественскія свечкі, перадаецца з рук у рукі прыгожая калядная кампазіцыя, разразаецца ружовая стужка адкрыцця. Яе кавалачкі падзелены паміж гасцямі і гаспадарамі – на памяць. А госці – званыя і шматлікія: вакальны калектыў «Крынічанька» Смаргонскага ТЦСАН «Цёплы дом» і вакальная група «Аксаміткі» Астравецкага ТЦСАН. Побач з «Аксаміткамі» заўсёды танцавальная група «Чаромушкі». Задорныя, лёгкія на нагу дзяўчаты – назваць іх бабулямі язык не паварочваецца. Іх цудоўны карагод «Лябёдушка» проста зачараваў гледачоў!
«Крынічанька»
«Аксаміткі»
«Лябёдушка»
Госці прэзентавалі сябе самі – праз вядучых сваіх канцэртных праграм Ірыну Аляксандраўну Трухіну і Дануту Францаўну Чарнушэвіч. Гаспадароў – трыа «Салавейкі» і салістку Вікторыю Мізулу – назвала Людміла Іванаўна Кухарэвіч. А аб’яднала ўсіх у цеснае кола вядучая імпрэзы Наталля Уладзіславаўна Стакун.
«Салавейкі»
Спявае Вікторыя Мізула
І загучалі песні – харавыя, сольныя, аўтарскія. «Аксаміткі» ўпершыню выканалі аднайменную песню, што нарадзілася ў калектыве і мае стаць яго візітнай карткай. А «Крынічанька» захапіла, апроч іншага, цудоўным «Смаргонскім вальсам» – таксама своеасаблівай візітоўкай. Яшчэ былі пранікнёныя вершы пра родны дом, малую радзіму, нашу беларускую Каляду, лірычныя абразкі – сярод гасцей і гаспадароў аказаліся і паэты.
Так у сяброўскай бяседзе з песнямі, танцамі, задушэўнымі размовамі пад духмяную гарбату і шчодры пачастунак на любы смак прайшоў той нядзельны дзень. Звонку, за сценамі клуба, дзьмуў пранізлівы вецер і імжыў дождж, а ў зале разліваліся хвалі душэўнага цяпла. Цудоўныя Калядныя сустрэчы атрымаліся! З тых, у якіх мусіць быць паўтор.