Якія самыя незвычайныя падарункі атрымлівалі астраўчане на навагоднія святы
10:16 / 20.12.2019
Тамара Апалінская, пенсіянерка:
– Мне здаецца, што мы ў дзяцінстве больш радаваліся падарункам, чым сучасныя дзеці. Жылі мы небагата, але дружна. Ёлку ўпрыгожвалі ватай і самаробнымі цацкамі. У бацькоў нас было пяцёра, але мама старалася парадаваць на Новы год кожнага. Памятаю, як пад ёлкай знайшла шкарпэтачкі ў палоску – і гэта для мяне была такая радасць! Тыя адчуванні жывыя і зараз.
Цяпер і бацькі, і бабулі з дзядулямі не шкадуюць грошай на навамодныя цацкі, але ці радуюцца ім дзеці гэтак жа, як мы ў свой час, – пытанне…
Галіна Герасімава, прадавец (без фота):
– Нават і не ўспомню, што асаблівае і запамінальнае атрымлівала на Новы год. А вось адзін са сваіх дзён нараджэння я сустрэла ў Парыжы каля Эйфелевай вежы. Мары збываюцца! Калі з’явіліся ўнукі, стала падпрацоўваць Снягуркай. (Усміхаецца.) У навагоднюю ноч абавязкова загадваю жаданне – гэта ўжо традыцыя. А самым галоўным падарункам лічу здароўе – яго ні за якія грошы не купіш.
Ігар Канюк, электраманцёр:
– Самы лепшы падарунак – грошы. Гэта бяспройгрышны варыянт на ўсе часы. Не заўсёды ведаеш, што чалавеку падабаецца ці што ён хоча атрымаць. Нічога асаблівага на навагоднія святы мне не дарылі.
Карына Аляхновіч, у дэкрэтным адпачынку:
– Чамусьці найбольш запомнілася, як муж на Новы год падарыў мабільны тэлефон, пра які я марыла. З нараджэннем дачушкі – усё для яе. Дзядуля Мароз сёлета прынясе Валерыі 3D-планшэт, на якім можна маляваць з дапамогай святла.
P.S. А які навагодні падарунак запомніўся вам найбольш? Пішыце ў каментарыях у суполках «АП» у сацыяльных сетках.
