Варнянскія «Следапыты» ў тройцы лідараў
13:13 / 06.08.2019
Праграма злёту, падчас якога юнакі змагаліся за пераходны кубак, уключала ваенна-патрыятычныя і спартыўныя іспыты. Каманды прымалі ўдзел у ваенізаванай эстафеце, стральбе з вінтоўкі, кіданні вучэбнай гранаты, перацягванні каната, прайшлі таксама інтэлектуальны турнір, конкурс баявых лісткоў і іншыя выпрабаванні.
– Праграма была вельмі насычанай, – расказала намеснік дырэктара Варнянскага НПК Наталля Адула. – Нягледзячы на канікулы наш атрад «Следапыты» пад кіраўніцтвам настаўнікаў Уладзіміра Саленіка, Дзмітрыя Карвецкага і Кацярыны Сульжыцкай старанна рыхтаваўся – і паказаў добрыя вынікі.
Так, падчас агляду-конкурсу строю і песні «Раўненне на сцяг!» камандзір атрада Канстанцін Юркойць цудоўна справіўся са сваёй задачай, беспамылкова аддаўшы рапарт начальніку штаба, а атрад дакладна выканаў усе страявыя прыёмы – і гэта дазволіла камандзе заняць 2 месца.
Вечарам каманды дэманстравалі свае прэзентацыі пад назвай «Мы – адзінае цэлае». У творчым выступленні варнянцы распавялі пра сябе, сваю школу і малую радзіму.
«Тарнада», «Снайпер», «Пагранічная паласа» – на працягу наступнага дня школьнікам давялося бегаць, скакаць, кідаць гранату, перацягваць канат, шукаць «сховішчы» – словам, дэманстраваць фізічна-спартыўныя навыкі і ўменні. Гэты дзень прынёс варнянскай камандзе ажно чатыры дыпломы.
А вось у апошні дзень удзельнікам давялося праявіць інтэлектуальныя і творчыя здольнасці. У праграме стаялі «Медыя-азбука», «Эрудыт-лато» і «Што? Дзе? Калі?», а таксама конкурс сценгазет. У скарбонку дасягненняў варнянцы паклалі Дыпломы за 2 і 3 месцы адпаведна.
Перамога ў кожным конкурсе набліжала каманды да запаветнага Кубка і давала ім шанс трапіць на п’едэстал. Сёлета пераходны Кубак заваявалі смаргонскія школьнікі, другое месца заняла каманда Кастрычніцкага раёна горада Гродна. А вось трэцяе месца «ўзялі» варнянскія школьнікі.
Акрамя таго прадстаўнік астравецкай каманды Яраслаў Мядэйша атрымаў дыплом у намінацыі «За ўпорства і працалюбства», а камандзір атрада Канстанцін Юркойць быў адзначаны дыпломамі ў намінацыях «Лепшы стралок», «Лепшы страявік злёту» і «За імкненне да перамогі».
Добрыя эмоцыі і пазітыўны настрой удзельнікам злёту падарылі экскурсіі па вучэбным цэнтры і ў кіналагічны цэнтр, а таксама плац-парад і канцэрт аркестра Смаргонскай пагранічнай групы.