Хроніка веснавых работ па стане на 1 красавіка
16:08 / 02.04.2019
Паводле звестак сектара раслінаводства ўпраўлення сельскай гаспадаркі і харчавання, па стане на 30 сакавіка пад сяўбу збожжавых і зернебабовых падрыхтавана 4 402 гектары глебы, што складае 25% ад неабходнага.
З даведзеным планам яравой сяўбы аграрыі раёна ўжо справіліся на 16%: зерне збожжавых і зернебабовых прыгорнута ў глебу на 2 774 гектарах.
Раённы «табель рангаў» узначальвае КСУП «Гудагай», дзе засеяна 915 гектараў – 31% ад плана. У КСУП «Гервяты» сейбіты прыгарнулі насенне на плошчы 800 гектараў (20% ад плана), у КСУП «Варняны» – 424 гектараў (9%), КСУП «Міхалішкі» – 318 гектараў (12%), у РУП «Астравецкі саўгас «Падольскі» – 317 гектараў (10%).
Сярод культур лідзіруе пшаніца, пад якую сёлета адведзена 2 625 гектараў. Засеяна 859 гектараў – 33% ад запланаванага. На долю яравога аўса прыпадае 900 гектараў раённых ніў, з якіх на 293 гектарах насенне ўжо прыгорнута ў глебу (33%). Ячмень «заняў» 1 191 гектараў (26%).
З выкананнем другой па важнасці задачы – падкормкай азімых – аграрыі раёна справіліся амаль напалову і ўнеслі «мінералку» на 4 776 гектарах. У ліку аўтсайдараў – КСУП «Міхалішкі», дзе падкармілі толькі 7% азімых культур пры сярэднераённых 53%.
Рапс падкормлены на плошчы 1 700 гектараў (69%), шматгадовыя травы – на 2 651 гектар (50%), сенакосы і паша – на 1 488 гектарах (12%).