Служба 115 – знают ли о ней островчане?

Кругласутачная служба 115, якая прыйшла на змену заяўкам на тэлефон дыспетчара ЖКГ, працуе з 1 лістапада мінулага года. Як наладжана яе работа, высвятляў карэспандэнт “АП”.

Чатыры аператары астравецкай службы дыспетчарскай, якія, да слова, адрознівюцца ад іншых работнікаў жыллёва-камунальнай гаспадаркі асобнай уніформай, кругласутачна прымаюць тэлефонныя заяўкі, уносяць іх у аўтаматызаваную сістэму і тут жа адпраўляюць на рэагаванне майстру. Той накіроўвае па ўказаным адрасе рамонтную брыгаду, а пасля дае справаздачу дыспетчару. Толькі пасля гэтага заяўка лічыцца выкананай і на экране камп‘ютара начальніка службы загараецца зялёным колерам.

Усе работы па заяўках кантралююцца начальнікам службы, які звязваецца з кліентам, каб удакладніць тэрміны і якасць іх выканання, а пры неабходнасці і выязджае на адрас кліента.

На выкананне тэлефоннай заяўкі прадугледжаны 24 гадзіны, але, калі ёсць чарга, то давядзецца пачакаць – аднак не больш прадугледжаных тэрмінаў. На экстрэнныя сітуацыі рамонтная брыгада выязджае адразу.

КАМЕНТАРЫЙ СПЕЦЫЯЛІСТА

Вольга Шумановіч, начальнік кліенцкай службы і сэрвісу 115:

– Астравецкая служба 115 працуе на тэрыторыі горада і раёна і дазваляе не толькі паскорыць прыняцце і выкананне заявак кліентаў, але і прааналізаваць якасць работы як падрадных арганізацый, так і кожнага ўчастка ЖКГ: ЖЭСа, цеплавых сетак, добраўпарадкавання, азелянення і саначысткі, энергетычнай і водаправодна-каналізацыйнай гаспадарак. Але асноўная задача службы – хутка рэагаваць на звароты кліентаў.

Мы прымаем званкі па ўсіх жыллёва-камунальных паслугах і аварыйных выпадках, якія могуць здарыцца ў горадзе і ў сельскай мясцовасці. Калі пытанне, з якім кліенты звяртаюцца ў службу 115, не ў кампетэнцыі ЖКГ, аператар перадае яго іншым службам горада: МНС, міліцыі, ДРБУ, элетрасеткам, райгазу і іншым – або падказвае патрэбны нумар тэлефона.

Спецыялісты службы 115 не толькі прымаюць “гарачыя” званкі, але і аказваюць кансультатыўную дапамогу, разглядаюць заявы на выкананне паслуг ЖКГ на платнай аснове.

КАРЫСНА ВЕДАЦЬ

*Дазваніцца на кароткі нумар 115 можна з мабільнага тэлефона любога аператара.

*Заяўкі прымае служба той ЖКГ, у раёне дзеяння якой на момант падачы знаходзіцца заяўнік. Да прыкладу, заяўку на прачыстку каналізацыі ў астравецкай кватэры, якую падаў уладальнік, знаходзячыся ў Ашмянах, прыме ашмянская служба 115, якая пераадрасуе яе на Астравецкую ЖКГ.

*Для рэгістрацыі заяўкі па нумары 115 трэба ўказаць кантактныя дадзеныя: прозвіша, імя, імя па бацьку, адрас, тэлефон – і прычыну звароту.

*Падаць пісьмовую заяўку ў службу 115 можна ў інтэрнэце на партале “Мой горад” 115.бел”, спасылка на які змешчана на сайце Астравецкага РУП ЖКГ. Каб мясцовыя дыспетчары ўбачылі заяўку, трэба зарэгістравацца, увесці логін, пароль і адрас электроннай пошты. Карыстальнікі мабільных тэлефонаў могуць спампаваць мабільны дадатак з аднайменнай назвай – там заяўкі можна падмацоўваць фотаздымкамі. Час мадэрацыі заяўкі ў інтэрнэце – да 72 гадзін, адказа на запыт – да 8 працоўных дзён. На апрацоўку прымаюцца толькі карэктныя заяўкі.

УВАГА: Пры рэгістрацыі на сайце ў спісе гарадоў абавязкова выберыце Астравец!

ЛІЧБА

Па Гродзенскай вобласці ў раённых цэнтрах адкрыта 17 адзіных дыспетчарскіх службаў 115.