Дзень інфармавання насельніцтва прысвяцілі Году малой радзімы
Па традыцыі, у трэці чацвер месяца інфармацыйныя групы сустракаюцца з калектывамі прадпрыемстваў і арганізацый раёна. Студзеньскі дзень інфармавання насельніцтва быў прысвечаны Году малой радзімы і знакавым падзеям 2018 года.
З працоўным калектывам КСУП “Гервяты” сустрэліся намеснікі старшыні Астравецкага райвыканкама і камісіі па справах непаўналетніх.
“Мой родны кут – як ты мне мілы…”
Для кожнага чалавека месца, дзе ён нарадзіўся і гадаваўся, мае выключнае значэнне. Нездарма нашы продкі казалі: мілы той куток, дзе рэзаны пупок.
– Сёлета адначаецца 100-годдзе БССР. З таго часу вядзецца гісторыя нашай краіны, – падкрэсліў намеснік старшыні райвыканкама Віктар Свіла. – Год – гэта не такі ўжо і вялікі тэрмін, таму па ініцыятыве Прэзідэнта было вырашана, што пад знакам Году малой радзімы пройдуць 2019 і 2020 гады. Галоўнае – каб людзям было камфорта жыць на сваёй зямлі. Гэта не проста ідэя, а канкрэтны план мерапрыемстваў.
Віктар Збігневіч падрабязна спыніўся на кожным пункце: навядзенне парадку на зямлі і добраўпарадкаванне населеных пунктаў, стварэнне камфортных умоў для пражывання і стымуляванне дзелавой актыўнасці і іншых – і прывёў канкрэтныя прыклады з развіцця нашага раёна і горада.
Сімвалічна, што Год малой радзімы супаў з 550-годдзем Астраўца, святкаванне якога прайшло ў жніўні. З нагоды юбілею горад прымаў падарункі на працягу ўсяго года: адкрыццё спартыўна-аздараўленчага комплексу, стадыёна, гандлёвых аб’ёктаў і іншыя.
“Адзін неабдуманы ўчынак можа зламаць дзіцяці лёс”
Намеснік старшыні камісіі па справах непаўналетніх Тарэса Драган адзначыла, што ў раёне назіраецца тэндэнцыя зніжэння колькасці правапарушэнняў, але парушальнікаў стала больш. За кожным крадзяжом ці хуліганствам стаіць лёс асобнага дзіцяці.
Замест халоднай коснай статыстыкі Тарэса Мар’янаўна прывяла выпадкі з жыцця, якія красамоўней за лічбы паказваюць, што адзін неабдуманы ўчынак можа зламаць дзіцяці ўсё жыццё.
– Будзьце ўважлівымі і беражыце сваіх дзяцей, – такімі простымі на першы погляд, але вельмі важнымі словамі завяршыла сваё выступленне Тарэса Драган.
Што пасееш – тое і пажнеш
Першы намеснік старшыні райвыканкама, начальнік упраўлення сельскай гаспадаркі і харчавання Іван Карніла, які нядаўна прыехаў у наш раён, ужо паспеў увайсці ў курс спраў развіцця сельскай гаспадаркі:
– Мінулы год для аграрыяў быў няпростым. У вашай гаспадарцы прывагі жывёлы большыя за сярэднераённыя, і за мінулы год вы атрымалі 6,5 тысяч кілаграмаў малака ад каровы, што на 200 кілаграмаў больш за пазалеташні год. Гэта нядрэнныя вынікі, але трэба імкнуцца да большага. Задача нумар адзін – падрыхтаваць усю тэхніку да пасяўной кампаніі. Спознімся з тэрмінамі сяўбы – недабяром збожжа і кармоў, недакормім жывёлу – не атрымаем малака. У сельскай гаспадарцы ўсё ўзаемазвязана – і тут дробязяў не бывае.
Акрамя гэтага, на дні інфармавання былі ўзняты пытанні пажарнай бяспекі, бяспечных паводзінаў на лёдзе і пры катанні з горак.
Пасля абеду дзень інфармавання правялі намеснікі старшыні райвыканкама: ў СШ №2 – Віктар Свіла, на прадпрыемстве бытавога абслугоўвання насельніцтва – Павел Мілешка.