Мова наша ці чужая?
16:12 / 02.07.2018
Ціна Крупіна:
– Беларускую мову я чую вельмі рэдка і толькі ад сына. Але трэба, каб яна гучала як мага часцей, бо яна – наша. У нас практычна ніхто не размаўляе на ёй, а калі выязджаем за мяжу, то пытаюцца, хто мы. Беларусы? Тады чаму не размаўляеце па-беларуску?
Каб пашырыць ужыванне беларускай мовы, трэба кампетэнтныя настаўнікі ў школе, якія змогуць прывіць да яе любоў і павагу.
Яўген Базюк:
– У Астраўцы – рэдка, а вось калі прыязджаю да бабулі ў вёску – часта. Каб наша мова гучала, трэба, каб бацькі размаўлялі са сваімі дзецьмі па-беларуску. Вучыць мове трэба з маленства.
Пётр Катышаў, Літва:
– Літаратурную – нідзе, а вось «трасянку», бывае, чую.
Пройдзе савецкае пакаленне, пакаленне іх дзяцей, якія прывыклі гаварыць па-руску, і людзі зразумеюць, наколькі гэта важна – ведаць родную мову. Галоўнае, каб быў адпаведны ўзровень адукацыі. Беларусы абавязкова павінны мець сваю мову – тое, што іх адрознівала б ад астатніх народаў.
Ангеліна Івашкевіч:
– Я вучуся ў беларускамоўнай школе. Штодня мы чуем беларускую мову і размаўляем на ёй. Хочацца, каб яна гучала ў паўсядзённым жыцці кожнага. А як інакш – яна ж наша, родная!
Каб дапамагчы людзям загаварыць па-беларуску, іх трэба заахвочваць: праводзіць як мага больш мерапрыемстваў, конкурсаў праводзіць на беларускай мове.