Чем «отличились» преступники района
09:20 / 13.04.2018
Самымі распаўсюджанымі злачынствамі ў нашым раёне застаюцца крадзяжы. А вось асартымент абраных аб’ектаў часам здзіўляе: сярод украдзеных трафеяў можна сустрэць перфаратар, кавалкі мыла і нават клык дзіка.
Узбуджана крымінальная справа.
***
Наступны злодзей, напэўна, планаваў адкрыць будаўнічую фірму, аднак для гэтага яму не хапала адпаведных інструментаў. Праблему ён вырашыў выправіць за кошт другіх. Сарваўшы навясны замок, злодзей пранік у вагончык домаўладання па вуліцы Дружнай і ўкраў адтуль бензапілу, дрэль, балгарку і іншыя прылады на суму 335 беларускіх рублёў. Здабытага падалося мала – і ён завітаў у вагончык на вуліцу Спартыўную. Адтуль прыхапіў з сабой генератар, дрэль-міксер, некалькі балгарак, іншыя інструменты на 1 150 беларускіх рублёў. Аднак, падобна, злодзей вырашыў зрабіць оптавы крадзеж – і на «закуску» пранік у недабудаваны дом па той жа вуліцы, адкуль вынес трымер коштам 400 беларускіх рублёў.
У адносінах да злодзея ўзбуджана крымінальная справа.
***
«Вялікі камбінатар» з Варнян аказаўся менш пераборлівым, але гаспадарлівым. Выпіўшы для смеласці, ён праз акно ўлез у жылы дом у Стаўбурах. Там мужчына паквапіўся на чатыры каструлі, патэльню, два кавалкі мыла і тэлевізійную прыстаўку, якія і прыхапіў з сабой. Агульная сума матэрыяльнага ўрону гаспадароў склала 100 беларускіх рублёў.
***
Двух аўтамабільных акумулятараў коштам 50 рублёў 40 капеек кожны недалічыў гаспадар дома па вуліцы Інтэрнацкая ў Варнянах.
Злодзей без перашкод зайшоў на прысядзібны ўчастак і ўкраў акумулятары. У адносінах да яго ўзбуджана крымінальная справа.
***
Жыхар горада Нароўля, які зараз часова пражывае ў Астраўцы, вырашыў нікуды не пранікаць, замкі не зрываць, далёка не хадзіць – і абакраў суседзяў, пражываючых з ім у адной кватэры. Такім чынам ён «набыў» заплечнік з тканіны, мабільны тэлефон, спартыўную футболку, іншыя рэчы, а таксама беларускія і ўкраінскія грошы.
А вось скарыстацца ўкрадзеным злодзею не ўдалося – у адносінах да яго ўзбуджана крымінальная справа.
***
Аматар да чужых грошай аб’явіўся на пляцоўцы будаўніцтва Беларускай АЭС. Злодзей без перашкод залез у бытавы вагончык адной з арганізацый – і ўкраў са стала кашалёк, у якім акрамя беларускіх рублёў і валюты знаходзіліся дзве банкаўскія карткі. Матэрыяльны ўрон пацярпелага склаў 290 беларускіх рублёў.
***
Прасціна, клык дзіка, 5 пар рог касулі і 17 пар рог лася – з такім здабыткам злодзей пакінуў дачны домік у Субялях. У чужое домаўладанне ён пранік, разбіўшы акно. Украдзенае ацэнена ў 307 беларускіх рублёў.
Супрацоўнікі аддзялення крымінальнага вышуку хутка знайшлі аматара паляўнічых трафеяў – ім аказаўся неаднойчы судзімы жыхар вёскі Ізабеліна.
Маўчанне – золата
Цяпер трэба сцерагчы свае грошы не толькі ад рэальных, але і ад віртуальных зладзеяў.
У адносінах да аднаго такога хакера, які з дапамогай спецыяльнай праграмы даведаўся пін-коды банкаўскіх картак ААТ АСБ «Беларусбанк» і ЗАТ «БПС-Банк», узбуджана крымінальная справа. Астраўчане, якім належалі гэтыя карткі, пазбавіліся са сваіх рахункаў 74 і 275 беларускіх рублёў.
Звяртаемся да ўсіх грамадзян: ні ў якім выпадку не паведамляйце пін-коды ці рэквізіты сваіх банкаўскіх картак, аднаразовыя коды доступа, сеансавыя ключы да інтэрнэт-банкінгу і іншыя звесткі ў сацыяльных сетках і віртуальных перапісках, нават калі аб гэтым просяць родныя ці сябры. За іх прозвішчамі могуць хавацца ашуканцы, якія незаконна праніклі на чужы профіль.
Для ажыццяўлення злачыннага плана жыхара вёскі Солы не спынілі ні адлегласць, ні адказнасць перад законам.
Нецвярозы мужчына ноччу прыехаў на веласіпедзе ў Рымдзюны, дзе наўмысна падпаліў гаспадарчую пабудову адной з жыхарак вёскі. Для гэтага ён абліў анучку гарэлкай, падпаліў і закінуў яе ў адрыну, дзе знаходзілася сена. Полымя ўспыхнула імгненна і знішчыла ўсё, што знаходзілася ў адрыне.
У адносінах да падпальшчыка ўзбуджана крымінальная справа.
Сталічны браканьер
Мужчына хацеў здабыць дзіка, а зарабіў крымінальную справу.
Жыхар Мінска вырашыў задаволіць паляўнічы запал і непадалёк вёскі Жукойні застрэліў дзікага кабана. Толькі ні паляўнічай пуцёўкі, ні дазволу на здабычу дзікай жывёлы ў яго не аказалася.
За свае дзеянні мінчаніну прыйдзецца адказваць: незаконным паляваннем ён нанёс урон навакольнаму асяроддзю ў памеры 2 760 беларускіх рублёў.
«Клубнічка» не ў законе
За распаўсюджванне відэаролікаў парнаграфічнага характару паплаціўся жыхар Астравецкага раёна.
Напэўна, аматару «клубнічкі» настолькі падабалася праглядваць пікантнае відэа, што ён размясціў некалькі такіх ролікаў на сваёй старонцы ў сацыяльнай сетцы «ВКонтакте». Доступ да прагляду размешчанага відэа мужчына не абмежаваў – яго мог паглядзець кожны наведвальнік старонкі. Аднак такія дзеянні лічацца распаўсюджваннем парнаграфіі і караюцца законам, таму ў адносінах да мужчыны ўзбуджана крымінальная справа.
Кулачныя баі
Распіццё спіртных напояў, пошукі прыгод, спрэчка, бойка – і ўзбуджэнне крымінальнай справы.
Менавіта так разгортваліся падзеі для жыхара Валгадонска, які зараз працуе на пляцоўцы будаўніцтва БелАЭС і пражывае ў Астраўцы. Нападпітку ён знаходзіўся ў кватэры дома па вуліцы Кветкавай, дзе пасварыўся з мужчынам, які там пражывае. У выніку расіянін «разруліў» спрэчку некалькімі ўдарамі апанента кулаком па галаве.
За нанясенне цяжкіх цялесных пашкоджанняў у адносінах да мужчыны ўзбуджана крымінальная справа.
Марэк СІНКЕВІЧ,
намеснік начальніка раённага аддзела Следчага камітэта.
