Астравецкія школьнікі сустрэліся с беларускім пісьменнікам Валерыем Квілорыем
11:24 / 05.04.2018
А ці сустракаліся вы з дзіцячымі пісьменнікамі? Гэта людзі, у якіх быццам засталася ў душы часцінка дзіцячага светаўспрымання, фантазіі, гумару, якія ўвасабляюцца ў цікавых і захапляльных творах для дзяцей.
Такім яркім прадстаўніком і стваральнікам дзіцячых апавяданняў з'яўляецца беларускі дзіцячы пісьменнік Валерый Тамазавіч Квілорыя, які з радасцю адгукнуўся на запрашэнне Астравецкай дзіцячай бібліятэкі прыехаць на творчую сустрэчу з нашымі чытачамі.
Валерый Тамазавіч прывёз шмат сваіх кніг і яшчэ больш вясёлых апавяданняў, якія распавядаў дзецям з такім захапленнем, што школьнікі суправаджалі яго словы выбухамі смеху і захопленымі воклічамі.
Пісьменнік па-майстэрску валодае дзіцячай аўдыторыяй, працуе з залай, задае цікавыя пытанні-заданні, дэманструючы веды дзіцячай псіхалогіі. Нават дарослыя захапляліся яго смешнымі гісторыямі і смяяліся разам з дзецьмі.
Валерый Квілорыя пры дапамозе мультымедыйнай прэзентацыі пазнаёміў гасцей са сваімі кнігамі, распавёў пра калег-пісьменнікаў, якія пішуць для дзяцей. Падчас яго выступлення школьнікі раз-пораз цягнулі рукі, каб задаць пытанні. Дзяцей цікавіла ўсё: якія кнігі чытае Валерый Тамазавіч, як адпачывае, ці змог бы ён працаваць настаўнікам, як пішуцца апавяданні, ці ёсць у яго дзеці-сябры, як палюбіць чытанне, як з'яўляюцца героі яго кніг, ці піша ён для дарослых, як ён вучыўся ў школе. Аўтар арыгінальна адказваў на пытанні і сам задаваў іх дзецям.
Ганна КЕРЭЛЬ,
бібліятэкар Астравецкай дзіцячай бібліятэкі.