Ці вераць астраўчане ў цудадзейную сілу вадохрышчанскай вады
09:10 / 19.01.2019
Ці вераць жыхары і госці нашага горада ў цудадзейную сілу вадохрышчанскай вады, высвятляў наш карэспандэнт.
– Канешне, нешта ёсць. Хоць я сам і католік, аднак у мяне хапае праваслаўных сяброў, якія шчыра радуюцца і адзначаюць Вадохрышча.
Аднак варта памятаць: гэта не проста акунанне ў купелі, а перш-наперш – шчырая вера і малітва.
– Не магу сказаць, што я шчырая веруючая: у царкву хаджу, як атрымліваецца. Святую ваду неяк спрабавала піць, але мне ад яе не стала ні лепш, ні горш. Тое самае тычыцца і акунання на Вадохрышча ў ледзяной купелі.
Аднак не буду катэгарычнай. Ведаю, што многім святая вада і акунанне ў купелі дапамагае. Таму ў мяне дома асвечаная вада стаіць на ўсялякі выпадак.
– А чаму б і не верыць? Нашы продкі верылі на працягу стагоддзяў і не нам адмяняць гэтыя ўстоі. Я католік, аднак не раблю розніцы паміж каталіцтвам і праваслаўем.
Наконт акунання ў купель, то гэта справа мне падабаецца. Летась я акунуўся на Вадохрышча, сёлета яшчэ думаю. Хаця можна сказаць, што я ўжо «ахрысціўся», калі на рыбалцы нядаўна пад лёд праваліўся (Смяецца).
– Я веру ў цуды, якія адбываюцца ў нашым жыцці па волі Бога. Чалавек, калі ён верыць па-сапраўднаму, і сам здольны на вялікія цуды.
Наконт акунання ў купель, я не супраць – з аднаго боку, а з другога – не адчуваю сябе гатовай да гэтага кроку. Хаця і не абавязкова акунацца цалкам. Наколькі я ведаю, дастаткова проста абмыць твар вадой з купелі.
– Канешне, вада, якую на Вадохрышча блаславіў бацюшка, валодае пэўнай энергетыкай.
Адзін мой знаёмы быў у моцнай дэпрэсіі . Аднак пасля таго, як яго ўгаварылі акунуцца на Вадохрышча, ачуняў.
Я і сам раней акунаўся, а зараз здароўе не дазваляе. Хаця калі ўсё арганізавана з розумам: ёсць дыванкі, каб па снезе басанож не хадзіць, месца для распранання закрытае, каб не на ветры, цёплая гарбата ці кава – то чаму б і не акунуцца?
