В Островце чествовали молодых специалистов
10:02 / 11.02.2017
Шматлікі дэсант актыўных і крэатыўных спецыялістаў высадзіўся на Астравеччыну ў жніўні мінулага года: рашучы погляд, задор у вачах і цвёрдая ўпэўненасць, што пры жаданні можна «горы звярнуць». За гэты час яны прайшлі «баявое хрышчэнне» на рабочых месцах і ўжо прывыклі да таго, што ранкам замест заняткаў ва ўніверсітэце ці каледжы трэба ісці на працу. Яны – маладыя спецыялісты Астравецкага раёна, ушанаванне якіх адбылося на мінулым тыдні. Ідэя ўрачыста вітаць маладых спецыялістаў на астравецкай зямлі ўзнікла трынаццаць гадоў назад – і з таго часу стала добрай традыцыяй. Гэта цудоўная магчымасць сабраць усіх прадстаўнікоў маладой змены ў адным месцы і ў адзін час, каб не толькі павіншаваць з пачаткам працоўнай дзейнасці, але пазнаёміць з раёнам, яго кіраўніцтвам і ўрэшце адзін з адным.
Вось і сёлета кінаканцэртная зала «Астравец» напоўнілася юнакамі і дзяўчатамі, якія напачатку з цікавасцю паглядзелі відэафільм пра маладых спецыялістаў, дзе ў галоўных ролях многія пазнавалі сябе.
А далей надышла чарга цёплых прывітальных слоў. Першай з гэтай місіяй на сцэну паднялася старшыня раённага Савета дэпутатаў Ірына Эдуардаўна Тальчук.– Мне вельмі прыемна бачыць у зале столькі маладых і актыўных людзей, – сказала І.Э. Тальчук. – Вы ўжо не нявопытныя навабранцы, якія ўпершыню прыйшлі на рабочае месца, а сапраўдныя спецыялісты, якія пераадолелі перыяд адаптацыі, паспелі праявіць свае здольнасці і зарэкамендаваць сябе адказнымі і добрасумленнымі работнікамі. Але самае цікавае ў вас яшчэ наперадзе. Дзякуючы будаўніцтву Беларускай АЭС, Астравецкі раён атрымаў магутны імпульс развіцця. Наш горад хутка расце: з’яўляюцца новыя аб’екты інфраструктуры – а разам з імі месцы работы і перспектывы прафесійнага росту. Таму, упэўнена, вы не пашкадуеце, што прыехалі працаваць менавіта на Астравеччыну.
Словы старшыні раённага Савета дэпутатаў пацвердзіў настаўнік фізікі СШ №2 Уладзімір Мікалаевіч Крывец. За паўтара года сваёй работы ён паспеў зарэкамендаваць сябе як цудоўны педагог і стаць пераможцам розных конкурсаў.
– Я лічу, што сучасны спецыяліст павінен быць адукаваным, ініцыятыўным і актыўным, – сказаў малады настаўнік. – Мы павінны не проста працягваць справу сваіх папярэднікаў, а развівацца і ўдасканальвацца.
А пасля надышла чарга ўшанавання новых работнікаў раёна. Маладых спецыялістаў самай шматлікай – сацыяльнай – сферы прывітаў намеснік старшыні райвыканкама Віктар Збігневіч Свіла.
– Астравец – перспектыўны горад энергетыкаў. Аднак ён не зможа існаваць і развівацца без маладых і ініцыятыўных людзей. Таму, спадзяюся, менавіта тут вы зможаце рэалізавацца як прафесіяналы і станеце сапраўнымі патрыётамі Астравеччыны і сваёй краіны.
З пажаданнямі не толькі шчыра і добрасумленна працаваць на палях і ў лясах Астравеччыны, але і пусціць тут свае карані звярнуўся да маладых работнікаў сельскай і лясной гаспадаркі першы намеснік старшыні райвыканкама Руслан Мікалаевіч Сачко.
Прымнажаць і развіваць прафесійныя навыкі, ствараць і рэалізоўваць цікавыя праекты, стаць не проста цаглінкамі, а трывалым фундаментам будучыні пажадалі новым работнікам Беларускай АЭС, сферы бытавога абслугоўвання, гандлю, будаўніцтва, архітэктуры, праваахоўных органаў і аддзела па надзвычайных сітуацыях намеснікі старшыні райвыканкама Павел Віктаравіч Мілешка і Віктар Мікалаевіч Зелянко.
А супрацоўнікі аддзела ідэалагічнай работы, культуры і па справах моладзі, Астравецкай дзіцячай школы мастацтваў і Астравецкага цэнтра творчасці дзяцей і моладзі парадавалі прысутных прыгожымі музычнымі нумарамі.А потым маладыя спецыялісты адправіліся знаёміцца з Астравецкім раёнам. Наведванне сучасных будынкаў гімназіі, ДЛГУ «Астравецкі лясгас», інфармацыйнага цэнтра АЭС, Астравецкай дзіцячай школы мастацтваў, а таксама новых мікрараёнаў, непаўторнага касцёла святой Тройцы ў Гервятах і памятнае фота ля каменя на пляцоўцы будаўніцтва БелАЭС пакінулі шмат прыемных уражанняў і, думаецца, запомняцца маладым спецыялістам надоўга.
Аднак і на гэтым сюрпрызы не скончыліся. Яшчэ іх чакалі «хлеб і відовішчы» ў «Галактыцы»: тут была падрыхтавана цікавая забаўляльная праграма.
Марына МАЦКЕВІЧ, фота Антона МАЛЬШЭЎСКАГА.
