Дабрачынны ранішнік стаў сапраўдным святам для дзяцей Астравеччыны
Новы год і Ражаство – той час, калі мары ўвасабляюцца ў рэчаіснасць. А якому дзіцяці не хочацца дапамагчы галоўнаму зімоваму чараўніку Дзеду Марозу і яго ўнучцы Снягурачцы запаліць ёлку? Такая магчымасць напярэдадні святаў выпала хлопчыкам і дзяўчынкам са шматдзетных, прыёмных сем’яў, выдатнікам вучобы, пераможцам конкурсаў і тым, хто напрыканцы мінулага тыдня завітаў у ККЗ «Астравец» на раённы дабрачынны ранішнік.
Па традыцыі штогадовую акцыю падтрымалі Астравецкія раённыя выканаўчы камітэт і Савет дэпутатаў, грамадскія арганізацыі «Белая Русь», «Беларускі саюз жанчын», «Беларускі фонд міру», БРСМ, аддзел адукацыі, спорту і турызму. Да дабрачыннай ініцыятывы сёлета далучыліся АСБ «Беларусбанк», ДЛГУ «Астравецкі лясгас» пагранічная камендатура «Гудагай».
Сертыфікаты на набыццё гульнявога, рэабілітацыйнага, аздараўленчага, вучэбна-развіваючага абсталявання атрымалі сацыяльна-педагагічны цэнтр, Цэнтр карэкцыйна-развіваючага навучання і рэабілітацыі і Дом сямейнага тыпу.
Раённае навагодняе свята адкрыла старшыня Савета дэпутатаў Ірына Эдуардаўна Тальчук, якая, віншуючы ўсіх з Новым годам, падкрэсліла, што дзеці – галоўнае ў жыцці кожнага з нас. Намеснік старшыні райвыканкама Віктар Збігневіч Свіла адзначыў, што акцыя «Нашы дзеці», якая праходзіць па ўсёй краіне, дазволіла не толькі хлопчыкам і дзяўчынкам, але і іх бацькам па-сапраўднаму адчуць навагоднія святы. Да віншаванняў прадстаўнікоў улады далучыліся кіраўнікі грамадскіх арганізацый, прадпрыемстваў і ўстаноў.
А потым дзяцей чакала сапраўдная навагодняя казка, дзе галоўныя героі Розачка і Цвятан з дапамогай выхаванцаў Цэнтра творчасці дзяцей і моладзі, якія да свята падрыхтавалі цудоўныя танцавальныя і вакальныя нумары, змагаліся за навагоднія ліхтарыкі са злой Вярбенай, а дапамагалі ім у гэтым іншыя казачныя героі. Урэшце ёлка заззяла рознакаляровымі агнямі і на свята завіталі Дзед Мароз са Снягуркай.
Дзеці ў навагодніх касцюмах чыталі белабародаму чараўніку вершы, спявалі песні, фатаграфаваліся на памяць і атрымлівалі падарункі.