Рэдакцыя аб’яўляе конкурс перадсвяточных відэаролікаў
14:37 / 22.12.2017
А ўпрыгожванне ёлкі і дома да навагодніх святаў? Гэта ж цэлае дзейства! У кватэры з’яўляецца зялёная прыгажуня, якая займае пачэснае месца ў галоўным пакоі… Тата ці мама дастаюць скрынку з ёлачнымі цацкамі, гірляндамі, мішурой – а дзеці круцяцца побач, імкнучыся дапамагчы… І паступова, адзін за другім, шкляныя шарыкі, шышкі, вавёркі і зайчыкі, «пераскочыўшы» некалькі разоў з адной лапкі на другую, займаюць-такі прызначанае для іх месца. Пад ёлкай пасяляюцца Дзед Мароз са Снягуркай – і запальваецца гірлянда!
Стоп! А чаму мы расказваем пра ўсё гэта? Упэўнены: вы і самі можаце гэта цудоўна зрабіць: не толькі адчуць святочны настрой, але і падзяліцца з іншымі – нашымі чытачамі і гледачамі.
Сёння зняць відэаролік можа кожны, у каго ёсць гаджэт – а ёсць яны амаль ва ўсіх. Вось мы і прапануем вам гэта зрабіць – і затым даслаць сваю «відэасправаздачу» ці спасылку на яе – аб тым, як вы ўпрыгожвалі навагоднюю ёлку, свой дом ці кватэру, на электронную пошту рэдакцыі. Адна ўмова: ваш відэафільм павінен доўжыцца не больш трох хвілін і быць адпаведнай якасці.
Абяцаем: лепшыя відэаролікі будуць змешчаны на сайце нашай газеты і на яе старонках у сацыяльных сетках. А самы-самы лепшы атрымае прыз ад рэдакцыі.
Падзяліцеся з намі, чытачамі і гледачамі сваім навагоднім настроем – нездарма ж кажуць, што раздзеленая радасць прымнажаецца шматразова!