Старшие ювеналы Островетчины сразились в интеллектуальном бою
15:31 / 25.01.2017
Прысутнічаць на спаборніцтвах юных знатакоў мне раней не даводзілася, таму аб узроўні падрыхтоўкі каманд і складанасці пытанняў я не мела ўяўлення. Між тым, усё аказалася вельмі сур’ёзна.
Самым лёгкім, можна сказаць, разміначным аказаўся першы блок, прысвечаны Ражаству Хрыстоваму. З ім больш-менш паспяхова справіліся ўсе каманды. Бясспрэчным лідарам стала каманда “GOODагай” – “узялі” 8 пытанняў з 10, сем правільных адказаў дала шасцёрка знатакоў “Імпульс” Спондаўскага дзіцячага сада-сярэдняй школы, шэсць – каманда “Сонца” Астравецкай СШ №2. Гудагайцы атрымалі за гэтую перамогу дыплом і абразкі Віленскай (Вострабрамскай) Маці Божай ад праваслаўнага храма святых апосталаў Пятра і Паўла.
Два другія блокі пытанняў у свой час разыгрываліся на рэспубліканскім турніры юных інтэлектуалаў “Несцерка-2016”. І паколькі астравецкія каманды ў ім не ўдзельнічалі, стала магчымым разыграць “Асарці” ў сябе дома. Абедзве падборкі ўтрымлівалі шмат “моцных арэшкаў”, чатыры з якіх “не раскусіў” ніхто. “Труны”, – змрочна пажартавалі б дарослыя інтэлектуалы.
У другім туры аднолькавую колькасць правільных адказаў далі гудагайскія, спондаўскія знатакі і каманда “СОУС” Цэнтра творчасці дзяцей і моладзі. Пераможцу павінен быў вызначыць адказ на дадатковае пытанне – разыгралі ажно тры. І ўперад вырвалася каманда Гудагайскай СШ.
У канчатковым выніку прызавыя месцы размеркаваліся наступным чынам: першынство, дзякуючы бліскучай гульні ў трэцім туры, дасталося камандзе ЦТДіМ “СОУС” , другімі сталі гудагайскія інтэлектуалы, трэцімі – спондаўскія знатакі. Дыпломы пераможцаў і “яблыкі азарэння” знайшлі сваіх уладальнікаў.
Таіса СЯМЁНАВА, фота аўтара.