Дзень нараджэння “Астравецкай праўды” адзначылі разам
Дзень нараджэння “Астравецкай праўды”, першы нумар якой выйшаў у свет 29 мая 1941 года, рэдакцыя газеты адзначыла разам са сваімі чытачамі, сябрамі, падпісчыкамі.
Кажуць, што падзея, якая адбылася ўпершыню, – гэта ўсяго толькі факт; калі яна адбылася ў другі раз – гэта ўжо традыцыя, а ў трэці – звычка. Хочацца спадзявацца, што святкаванне дня нараджэння “Астравецкай праўды” стане добрай звычкай, якая штогод 29 мая будзе збіраць разам астраўчан – а пакуль што гэтая традыцыя: у дзень першага выхаду газеты сустракацца на пляцоўцы перад раённым вузлом паштовай сувязі, каб разам адзначыць дзень нараджэння любімай газеты.
Усё было, як звычайна – цёпла, утульна, па-хатняму.
І разам з тым – асабліва.
Рэдакцыя пазнаёміла чытачоў са сваёй нованароджанай донечкай – АПэшкай, якая вельмі імкліва прапісалася на старонках газеты. Павіншавала пераможцаў рэдакцыйнага конкурсу “Шчаслівыя разам”. Правяла віктарыну, пераможцам якой – таксам па традыцыі! – стала Ванда Міхайлаўна Вайшанаровіч. Разыграла сярод удзельнікаў імпрэзы прызы ад раённай газеты. Выслухала ў свой адрас шмат цёплых віншаванняў і пажаданняў: калектыў віншавалі заснавальнікі – старшыня раённага Саветаў дэпутатаў Ірына Эдуардаўна Тальчук і намеснік старшыні райвыканкама Віктар Збігневіч Свіла, чытачы і няштатныя аўтары.
Падарункам ад газеты для ўсіх, хто ў той дзень выпісаў “Астравецкую праўду”, сталі сувеніры ад рэдакцыі. Пераможцы віктарыны і латарэі атрымалі прызы. А ўсе, хто прыйшоў на дзень нараджэння любімай газеты – добры настрой, які гасцям дарылі не толькі журналісты, але і артысты Павел Букель, Злата Мінкілевіч, Дзмітрый Максімаў і юныя танцоры Паліна Субко і Арсеній Філіпаў.