Любоў да прыроды праз сяброўства з лесам
10:22 / 24.03.2018
На ўскрайку сасновага лесу размешчаны і Альхоўскі дзіцячы сад. І канешне ж, мы вучым дзяцей беражліва адносіцца да гэтага прыроднага багацця.
Мы пачалі рэалізацыю трохгадовага праекта «Фарміраванне экалагічнай культуры дашкольнікаў праз арганізацыю прыродаахоўнай дзейнасці». Нашы малышы ўжо шмат ведаюць пра лес, кожны дзень назіраюць за яго велічнасцю і прыгажосцю, сезоннымі зменамі, жыццём раслін і жывёл, сюды яны прыходзяць і за прыродным матэрыялам для сваіх вырабаў.
Штодзень мы бачым дзятлаў, сініц, вераб’ёў, соек – іх падкормлівалі ўсю зіму.
Часам пашчасціць убачыць вавёрку, зайца і нават козачак, пра насякомых і гаварыць няма чаго!
Пра жыццё лесу і людзей, якія звязалі сваю прафесію з ім, да малышоў прыходзіць расказваць ляснік Міхалішкаўскага лясніцтва Яўген Сяргеевіч Волкаў. І не дзіва, што многія выхаванцы ўжо цяпер мараць стаць ахоўнікамі лесу.
Ранняй вясной каля нашага садка чуецца шматгалосы спеў цэлага хору птушак – напэўна, яны таксама ведаюць пра свята лесу. Мы далучаемся да іх. Са святам, лес! Расці нам на радаць!
Людміла ГРЭЙЦЬ, загадчык
Альхоўскага дзіцячага сада.