Выхаванцаў прытулку павіншавалі ашмянскія госці
Дабрадзеямі штогадовай дабрачыннай акцыі “Ёлка жаданняў”, дзякуючы якой спаўняюцца мары выхаванцаў дзіцячага сацыяльнага прытулку ў Варнянах, штогод становяцца розныя людзі: актывісты грамадскіх аб’яднанняў, працоўныя калектывы, валанцёры… Пазалетась іх шэраг папоўніла парафія Узвышэння Святога Крыжа ў Быстрыцы на чале з пробашчам ксяндзом Казімірам Ляховічам, сёлета – індывідуальныя прадпрымальнікі і грамадскія арганізацыі Беларускі саюз жанчын і Беларускі дзіцячы фонд. Але на гэтым віншаванні і падарункі не скончыліся...
Маладая жанчына, ураджэнка Варнян Вольга Даргель, якая разам з мужам жыве ў Ашмянах і выхоўвае гадавалага сыночка, вырашыла падарыць дзецям з прытулку сапраўднае свята.
– У сацыяльных сетках трапіўся на вочы пост газеты “Астравецкая праўда” пра лісты Дзеду Марозу, якія пісалі дзеці з прытулку, – расказвае Вольга. – Мяне гэта “зачапіла”: захацелася дзеткам, якія навагоднія святы сустракаюць без бацькоў, падарыць сапраўдны цуд.
Забягаючы наперад, адзначым, што ў маладой жанчыны гэта цалкам атрымалася. Вольга на сваёй старонцы ў сацыяльных сетках каля двух тыдняў пісала пра пра тое, што патрэбна дзецям з варнянскага прытулку. Прынцып шасці поціскаў рукі, які многім з нас знаёмы па навагодніх фільмах “Ёлкі”, спрацаваў – нераўнадушныя людзі адгукнуліся на пранізлівы пост жанчыны.
– Не чакала такога рэзанансу, – прызнаецца Вольга. – Удзел у акцыі, якую я назвала “Падары цуд”, прынялі ўдзел больш за 30 чалавек. Агульнымі намаганнямі мы сабралі каля 150 рублёў і падарункі: касметыку, сродкі асабістай гігіены, абутак, канцылярскія тавары і іншае. Дзякуй вялікі кожнаму, хто дапамог паверыць дзеткам з варнянскага прытулку ў цуд.
Напярэдадні Новага года валанцёры Алег Даргель і Вікторыя Ярмак прынеслі для хлопчыкаў і дзяўчынак у прытулак падарункі.
Так сталася, што напярэдадні свята выхаванка прытулку Алена была пераведзена ў Ашмянскі інтэрнат. Аднак і там белабароды чараўнік з дапамогай сваёй памочніцы Вольгі Даргель знайшоў дзяўчыну і зрабіў ёй падарунак.
Дзед Мароз выканаў жаданні выхаванцаў прытулку
Дзяцей з прытулку павіншавалі супрацоўнікі сельгастэхнікі
Новогодняя благотворительная акция стартовала в Островецком районе
