Деньги с благотворительного концерта переданы адресатам
10:15 / 22.12.2017
Кожны год у пачатку снежня праводзіцца дабрачынны канцэрт, у якім можа паўдзельнічаць кожны жадаючы. Сёлета падчас мерапрыемства збіралі сродкі для дзяцей і маладых людзей з псіханеўралагічнымі захворваннямі – было сабрана 6 120 рублёў.
Да дабрачыннасці далучыліся мясцовыя валанцёры, якія арганізавалі ў магазінах Астраўца збор прадуктаў.
Нядаўна валанцёры разам з загадчыцай аддзялення дзённага знаходжання для маладых людзей з інваліднасцю Аксанай Свірскай і бухгалтарам аддзела ідэалагічнай работы, культуры і па справах моладзі Святланай Маргуш наведаліся ў госці да дзяцей і маладых людзей з псіханеўралагічнымі захворваннямі – іх у раёне 10. Прадстаўнікі дабрачыннай дэлегацыі перадалі не толькі грошы і пасылкі з прадуктамі, але і прыгожыя сувеніры.
Дарэчы, дабрачынны канцэрт праходзіў не толькі ў Астраўцы, але і ў Гудагайскім доме культуры. І сабраныя сродкі таксама перададзены адрасатам – яшчэ пяць чалавек з інваліднасцю атрымалі матэрыяльную дапамогу і веру ў дабрыню і спагаду.
Навагодняя дабрачынная акцыя «Нашы дзеці» працягнецца да 10 студзеня – у кожнага ёсць магчымасць далучыцца да марафона дабрыні.
