Школьники Островетчины познакомились с буднями военнослужащих
08:54 / 23.02.2017
Як жывуць і служаць на мяжы, якім характарам трэба валодаць, каб паступіць у Ваенную Акадэмію, наколькі папулярная ў нашым раёне прафесія афіцэра – атрымаць адказы на гэтыя і многія іншыя пытанні можна было падчас традыцыйнай прафарыентацыйнай сустрэчы для старшакласнікаў «Ёсць такая прафесія – Радзіму абараняць!»
Школьнікі, якія сабраліся ва ўтульнай актавай зале сярэдняй школы №2, не раз чулі пра службу ва Узброенных Сілах падчас заняткаў па дапрызыўнай падрыхтоўцы. Больш таго: сённяшнія адзінаццацікласнікі летам прайшлі зборы і крыху наблізіліся да жыцця і будняў ваеннаслужачых.
А на свае вочы ўбачыць, як вучацца і праводзяць вольны час у Ваеннай Акадэміі, змаглі падчас прэзентацыі відэафільма пра курсанцкае жыццё ваеннаслужачых.
Пра значнасць службы гаварылі ў сваіх выступленнях ваенны камісар Астравецкага раёна Раман Курлоў і начальнік прызыву на ваенную службу Дзмітрый Багуслаўскі.
Сёлета 6 юнакоў збіраюцца паступаць на ваенныя спецыяльнасці. Час вызначыцца з прафесіяй яшчэ ёсць і ў тых старшакласнікаў, хто стаў удзельнікам прафарыентацыйнай сустрэчы, – звярнуцца з заявай у ваенкамат неабходна да 1 красавіка.
Пра службу на мяжы школьнікам расказаў начальнік аддзела пагранічнай службы «Гудагай» Кірыл Рагавы – і прадэманстраваў гэта на прыкладзе відэафільма пра будні гудагайскай заставы. А потым прапанаваў юнакам наведаць пагранічную заставу «Лоша» – і ўпэўніцца ў тым, што быць пагранічнікам – пачэсна і ганарова.
Закончылася мерапрыемства сацыялагічным апытаннем па тэме ваенна-прафесійнай арыентацыі дапрызыўнай моладзі, якое з адзінаццацікласнікамі правёў цэнтр псіхалагічных і сацыяльных даследаванняў.
Алена СВЕТЛАЯ, фота з архіва аддзела адукацыі, спорту і турызму.