Островецкие налоговики стали лучшими в республике по итогам 2016 года
13:47 / 18.02.2017
Падчас пасяджэння калегіі ганаровымі граматамі і падзячнымі лістамі былі адзначаны лепшыя інспекцыі краіны. Астравецкая раённая інспекцыя па выніках работы ў 2016 годзе заняла першае месца ў рэспубліцы.
У мінулым годзе астраўчане сталі пераможцамі абласнога спаборніцтва, перамога ж у рэспубліцы – першая ў скарбонцы астравецкіх падаткавікоў.
– Пры падвядзенні вынікаў конкурсу ўлічвалася больш за 40 паказчыкаў па выкананні падатковага заканадаўства, а таксама праводзілася ацэнка задаволенасці зарэгістраваных падаткаплацельшчыкаў на тэрыторыі Астравецкага раёна, – расказвае начальнік інспекцыі Міністэрства па падатках і зборах па Астравецкім раёне Канстанцін Іосіфавіч Ромаш. – Мы актыўна праводзім электроннае ўзаемадзеянне – прычым не толькі з юрыдычнымі асобамі, але і з фізічнымі. Так, 77,1% суб'ектаў гаспадарання прадстаўляюць падатковую дэкларацыю ў электронным выглядзе. Акрамя таго, існуе сервіс электроннага кабінета, у якім ажыццяўляе сваю дзейнасць 36,7% юрыдычных асоб і індывідуальных прадпрымальнікаў і 8,9% фізічных асоб.
Усё гэта, а таксама выкананне многіх іншых паказчыкаў і задач дазволіла інспекцыі Міністэрства па падатках і зборах па Астравецкім раёне стаць лепшай у краіне.
А 9 лютага ў Астраўцы сустракалі міністра па падатках і зборах Рэспублікі Беларусь Сяргея Эдуардавіча Налівайку і начальніка абласной інспекцыі Лідзію Міхайлаўну Сямашку, якія правялі ў раёне прыём грамадзян.
– Падчас сустрэчы з міністрам жадаючыя змаглі задаць і абмеркаваць цікавячыя іх пытанні – такіх было чацвёра, – расказаў начальнік інспекцыі Міністэрства па падатках і зборах па Астравецкім раёне Канстанцін Іосіфавіч Ромаш. – А потым прайшла сустрэча з супрацоўнікамі раённай інспекцыі, былі абмеркаваны пытанні развіцця і ўдасканальвання падатковай сістэмы, а таксама перспектывы развіцця Астравецкага раёна ў цэлым і падатковай інспекцыі ў прыватнасці.
Мовай лічбаў
У 2016 годзе інспекцыя Міністэрства па падатках і зборах па Астравецкім раёне працавала над выкананнем бюджэту – выкананне планаў даходнай часткі кансалідаванага бюджэту склала 100,3%.
Паступленні ў рэспубліканскі бюджэт ад падаткаплацельшчыкаў Астравеччыны склалі 31 мільён 203 тысячы рублёў і павялічыліся ў параўнанні з папярэднім годам на 49,7%.
Даходы мясцовага бюджэту павялічыліся да 26 мільёнаў 734 тысяч, гэта на 4,6% вышэй, чым у 2015 годзе.
Супрацоўнікі раённай інспекцыі Міністэрства па падатках і зборах у 2016 годзе правялі 11 семінараў, 15 «круглых сталоў», 55 прамых і 9 тэматычных тэлефонных ліній.
Алена ЯРАШЭВІЧ, фота аўтара