На Островетчине прошёл районный конкурс "Учитель года"
16:05 / 05.02.2017
На працягу некалькіх месяцаў 75 педагогаў з усіх школ і дашкольных устаноў раёна пісалі сачыненні, дэманстравалі тэарэтычную падрыхтоўку, методыкі правядзення ўрокаў і ўменне выказваць свае думкі на вызначаныя тэмы перад публікай – у выніку 28 з іх у розных намінацыях сталі ўдзельнікамі раённага конкурсу. Да фіналу дайшлі 10 настаўнікаў, выкладчыкаў розных школьных дысцыплін і 2 выхавальніцы дашкольных устаноў – менавіта ім давялося пазмагацца за права прадставіць наш раён на абласным этапе.
– Рэспубліканскі конкурс «Настаўнік года» вядзе свой адлік з 1991 года. За гэты час шмат пераможцаў нашых раённых конкурсаў удзельнічалі ў абласных. Аднак самым запамінальным стаў апошні конкурс «Настаўнік года», калі дзве нашы настаўніцы – Алена Чаславаўна Севасцьян і Тамара Іосіфаўна Качкан – трапілі ў лік лепшых педагогаў нашай краіны на рэспубліканскім этапе, – адзначыла падчас свайго выступлення начальнік аддзела адукацыі, спорту і турызму Наталля Іосіфаўна Станкевіч.
У фінал раённага конкурсу выйшлі настаўнікі СШ №1, СШ №2, гімназіі №1, Гудагайскай СШ, Варнянскага НПК і выхавальніцы ясляў-сада №2 і №1. Усе яны не ўяўляюць свайго жыцця без дзяцей і любімай прафесіі, з якой вызначыліся яшчэ ў дзяцінстве.
А пра тое, што гэта сапраўдныя педагогі, сведчылі выступленні-прэзентацыі. У кожнага з фіналістаў была свая «фішка», якую яны пастараліся прадэманстраваць падчас самапрэзентацыі.
Настаўнік фізікі СШ №2 Уладзімір Мікалаевіч Крывец працуе ў школах нашага раёна толькі 1,5 гады, аднак упэўнены, што галоўнае на ўроку – дзейнасць школьнікаў. Менавіта з гэтага пачынаецца шлях да перамог у конкурсах і канферэнцыях. А яны ў маладога педагога і яго выхаванцаў ёсць.
Настаўніца матэматыкі і інфарматыкі СШ №2 Ганна Віктараўна Аўсюкевіч таксама з маладых – у школе яна толькі 4 гады, але ў педагога ўжо склалася свая сістэма работы – пра гэта яна расказала, даказваючы тэарэму пад назвай «Педагогіка».
Некалькі разоў у дзень вітаецца са сваімі вучнямі на англійскай мове настаўніца гімназіі №1 Кацярына Валер’еўна Акуловіч – са сваёй місіяй вучыць дзяцей замежнай мове яна спраўляецца добра: пра гэта сведчылі расповеды яе вучняў і калег.
Настаўніца рускай мовы і літаратуры Варнянскага НПК Юлія Сяргееўна Кулеш добра памятае свой першы ўрок, першых вучняў і першую пастаўленую «дзясятку», хаця з таго часу мінуў не адзін год. Педагог упэўнена, што нецікавых тэм і ўрокаў не бывае, таму яна не толькі вучыць дзяцей, але і з задавальненнем сама вучыцца ў сваіх калег і ў вучняў.
Наступнай фіналістцы – настаўніцы беларускай мовы і літаратуры Гудагайскай сярэдняй школы Ірыне Мікалаеўне Жалток – імпануюць актыўныя формы работы. Для яе важна навучыць дзяцей вучыцца, і таму педагог ні на хвіліну не спыняецца ў сваім развіцці – гэта яна і прадэманстравала ў невялікім відэароліку.
А настаўніцу пачатковых класаў СШ №2 Марыю Казіміраўну Саўко прадставілі яе дзеці. А потым і яна сама расказала пра методыкі выкладання прадметаў у пачатковай школе і пахвалілася поспехамі сваіх вучняў – за 25 гадоў яе работы ў школе іх было шмат.
Трэнер па лёгкай атлетыцы, настаўніца фізічнай культуры і здароўя гімназіі №1 Анастасія Мечыславаўна Пашук зразумела, што хоча працаваць з дзецьмі, падчас праходжання практыкі на трэцім курсе. Пасля заканчэння ўніверсітэта яе захапленне лёгкай атлетыкай стала прафесіяй – і за тры гады работы ў школе ёй ёсць, чым пахваліцца.
Цікавы відэаролік-прэзентацыю пра тое, як навучыць дзяцей вучыцца, падрыхтавала настаўніца абслугоўваючай працы Гудагайскай СШ Таццяна Уладзіміраўна Грыва. Педагог упэўнена, што на ўроку мае значэнне ўсё, але самае галоўнае для настаўніка – пастаянная праца над сабой, бо ён жыве да таго часу, пакуль вучыцца.
Выкладчыца хіміі і біялогіі СШ №1 Кацярына Іванаўна Смольская расказала пра прымяненне на занятках і ў выхаваўчай рабоце інтэрактыўных метадаў навучання – а пра тое, што яны даюць станоўчыя вынікі, сведчыць шэраг прадстаўленых ёй узнагарод.
Наталля Валер’еўна Філіпава, якая выкладае хімію ў гімназіі №1, дзялілася сакрэтамі, як зацікавіць дзяцей і павысіць іх матывацыю да вучобы – а вынікі вучэбнай дзейнасці яе вучняў сведчаць, што ў педагога гэта атрымліваецца.
Выхавальніца ясляў-сада №2 Святлана Станіславаўна Баруўка калісьці сама выхоўвалася ў гэтым садку. Цяпер яна не толькі водзіць сюды сваіх дзяцей, але і сама тут працуе. А каб выхаванцам было цікава, выкарыстоўвае на занятках розныя гульні.
З пальчыкавымі гульнямі, выкарыстаннем элементаў выяўленчай дзейнасці, развіццём графічнай маторыкі знаёміла выхавальніца ясляў-сада №1 Вольга Мікалаеўна Карвэль – і нават дарослыя зацікавіліся тым, што можна тварыць у садку! Што тады казаць пра дзяцей?
Першы этап раённага конкурсу прайшоў захапляльна і пазнавальна. Не менш цікава было паслухаць разважанні педагогаў пра тое, якім быў настаўнік учора, кім з’яўляецца сёння і што будзе з ім заўтра.
Зноў жа кожны да выступлення падыйшоў творча і неардынарна. Адны расказалі пра гэта ў вершаванай форме, другім дапамог Маленькі Прынц з казкі А. Экзюперы, трэція разважалі пра сябе, чацвёртыя ўспаміналі сваіх педагогаў, пятыя з дапамогай вучняў стварылі ідэальны вобраз настаўніка трох эпох... Лейстматывам усіх выступленняў стала думка, што ва ўсе часы ў школах былі, ёсць і будуць сапраўдныя педагогі і ніхто ніколі не зможа іх замяніць.
Журы ж тым часам неабходна было вызначыць пераможцаў у прадметных намінацыях. Па выніках выстаўленых балаў Астравеччыну на абласным этапе прадставяць настаўнікі фізікі СШ №2 Уладзімір Мікалаевіч Крывец, англійскай мовы Кацярына Валер’еўна Акуловіч і фізічнай культуры і здароўя гімназіі №1 Анастасія Мечыславаўна Пашук, і рускай мовы і літаратуры Варнянскага НПК Юлія Сяргееўна Кулеш, а таксама выхавальніца ясляў-сада №1 Вольга Мікалаеўна Карвэль.
Усе пераможцы і ўдзельнікі конкурсу былі ўзнагароджаны дыпломамі і падарункамі ад аддзела адукацыі, спорту і турызму і раённай арганізацыі РГА «Белая Русь», якія педагогам уручылі Наталля Іосіфаўна Станкевіч і Ірына Фёдараўна Раткевіч.
Усе фіналісты, якія выходзілі на сцэну ў той дзень, сапраўды годныя людзі ў сваёй прафесіі. І галоўнае – адданыя дзецям і школе.
Каментарыі
– Крыху непрывычна сядзець у журы, асабліва з улікам таго, што некалькі гадоў назад я сама ўдзельнічала ў такім жа конкурсе, – падзялілася ўражаннямінастаўніца беларускай мовы і літаратуры Падольскага НПК, удзельніца рэспубліканскага конкурсу Тамара Іосіфаўна Качкан. – Было цікава паглядзець на ўрокі фіналістаў, паслухаць іх выступленні… Часам адзначала, што зрабіла б я, што змяніла б у выступленні, як правяла б урок... Мне было цікава. Гэты конкурс дае педагогам многае – і я з задавальненнем паўдзельнічала б у ім яшчэ раз.
– Усе 12 педагогаў, якія стаялі сёння на сцэне, – ужо пераможцы. Кожны з іх прайшоў шэраг выпрабаванняў перш, чым трапіць сюды – і з імі, а таксама з сённяшнімі заданнямі яны справіліся выдатна, – адзначыў намеснік старшыні Астравецкага райвыканкама Віктар Збігневіч Свіла.
Алена ЯРАШЭВІЧ, фота аўтара.