"Репортёр выходит в свет". Какие газеты и журналы попадают в ваш почтовый ящик?
15:22 / 25.09.2016
Прыемна халодным асеннім вечарам заварыць смачнай гарбаты і, уладкаваўшыся пад цёплым пледам, разгарнуць любімую газету. У кожнага яна свая: адны любяць рэгіянальныя выданні, другія – забаўляльныя часопісы, трэція – “усёведаючую” жоўтую прэсу. А якія перыядычныя выданні кладуцца ў вашу паштовую скрынку? – з гэтым пытаннем карэспандэнт звярнуўся да жыхароў Астравеччыны.
Юрый Тухта, вадзіцель.– Выпісваю толькі “Астравецкую праўду”. З яе даведаешся ўсё: хто нарадзіўся, хто памёр, што ў Астраўцы і раёне робіцца. Словам, мне “раёнкі” хапае – а на астатнія газеты часу няма. Пра міжнародныя навіны з радыё ці тэлебачання даведваюся.
Святлана Сянюць, знаходзіцца ў дэкрэтным адпачынку.– Шчыра кажучы, я ніякіх газет і часопісаў не выпісваю. Зараз усё можна знайсці ў інтэрнэце. Дастаткова зрабіць пару клікаў мышкай – і, калі ласка, выбірай на любы густ. Навіны Беларусі і краін свету чытаю, у асноўным, на інтэрнэт-партале “ТУТ. БАЙ”. Часцяком заходжу і на сайт раённай газеты. “Астравецкую праўду”, хоць і не выпісваю, але час ад часу купляю ў кіёску Белсаюздруку.
Аляксандр Куцько, супрацоўнік ДРБУ-159 з дачкой Янай.– Наша сям’я выпісвае толькі “Астравецкую праўду”. Мы жывём у Міхалішках, таму заўсёды цікава пачытаць пра людзей, асабліва пра тых, якія жывуць побач. Дарэчы, у “раёнцы” можна знайсці як мясцовыя, так і абласныя і рэспубліканскія навіны. А яшчэ мне падабаецца заходзіць на інтэрнэт-партал Гродзенскага аддзялення Дзяржаўтаінспекцыі – тут можна знайсці шмат цікавай і карыснай інфармацыі.
Любоў Катлабай, (без фота) працуе ў магазіне “АнаСтасія”.
– Да мяне ў паштовую скрынку рэгулярна кладзецца “Камсамолка”. Спецыяльна выпісваю “таўстушку”, бо ў ёй размяшчаюцца артыкулы на розныя тэмы і разнастайнага жанру: афіцыйныя, гістарычныя, забаўляльныя. Словам, цікавая газета. А мясцовыя навіны даведваюся, што называецца, з “сарафаннага радыё” (усміхаецца). Прыйдзеш на работу – і, бывае, такога наслухаешся, што нават не ведаеш: праўда гэта ці хлусня.
Андрэй Лукша, пенсіянер.– Раней, калі працаваў вадзіцелем, выпісваў часопіс “За рулём”. А цяпер хапае і “Астравецкай” – то я выпішу, то жонка. З “раёнкай” мы сябруем даўно, ужо і не памятаю дакладна, колькі гадоў, – і здраджваць мы ёй не збіраемся. Ды адкуль яшчэ пра мясцовыя навіны даведаешся?
Марына МАЦКЕВІЧ. Фота аўтара.
