Красивой, удобной и стильной - такой должна быть школьная форма

08:12 / 24.05.2016

Раённы бацькоўскі сход, на якім уздымаліся пытанні выкарыстання ў школах адзення дзелавога стылю, прайшоў на базе гімназіі №1. Яго ўдзельнікамі сталі прадстаўнікі ўстаноў адукацыі, бацькоўскай грамадскасці і, канешне ж, самі школьнікі, якім давядзецца ўжо ў наступным вучэбным годзе апрануць дзелавыя касцюмы.

– Мы адправілі запрашэнні большасці беларускіх фабрык і прадпрыемстваў – на іх адгукнуліся толькі ААТ «БелКрэда» і фабрыка «Калінка», якія сёння і прадставяць мадэлі адзення дзелавога стылю, – пачала размову начальнік аддзела адукацыі, спорту і турызму Наталля Іосіфаўна Станкевіч. – У некаторых нашых установах ужо ёсць вопыт выкарыстання аднолькавай школьнай формы. Як правіла, гэта спецыялізаваныя класы рознага накірунку. І глядзіцца такі дрэс-код стыльна.

Тое, што школьная форма можа быць прыгожай, прадэманстравалі вучні ваенна-патрыятычнага, прававога і педагагічнага класаў Гудагайскай школы: адзенне колеру «хакі» ў кадэтаў-пагранічнікаў, шэрага колеру – у міліцэйскага класа, чырвоныя жылеткі і гальштукі – у будучых педагогаў.

Есць элементы адрознення ў адзенні і іншых устаноў адукацыі: так, на падрыхтаванай загадзя прэзентацыі можна было ўбачыць мадэлі адзення гімназістаў, вучняў СШ №1, Мальскага і Варнянскага НПК.

– Згодна з Кодэксам аб адукацыі, нашэнне адзення дзелавога стылю ў школе з'яўляецца нормай. Змены ўнесены ва ўсе статуты ўстаноў адукацыі – і таму за школьнай формай – будучыня, – канстатавала галоўны спецыяліст аддзела адукацыі, спорту і турызму Людміла Міхайлаўна Апановіч. – У мінулым годзе ў некаторых навучальных установах нашай краіны стартаваў пілотны праект «Школа будучыні», які рэалізуецца ў школах Мінска, Віцебска, Бабруйска і Жодзіна і прадугледжвае ўвядзенне аднолькавага адзення дзелавога стылю для ўсіх класаў.

Такую ж мэту ставілі арганізатары бацькоўскага сходу ў Астраўцы. На сайце Міністэрства адукацыі размешчана распрацаваная калекцыя мадэляў школьнага адзення, якія могуць насіць вучні. Заставалася толькі вызначыцца, як, дзе і якая школьная форма будзе набыта.

Пра тое, як гэта можна зрабіць аператыўна і нядорага, расказалі спецыялісты навагрудскай фабрыкі «БелКрэда». А, каб не быць галаслоўнымі, увазе педагогаў, дзяцей і іх бацькоў яны прапанавалі калекцыю школьнага адзення. На сцэну выйшлі гімназісты і прадэманстравалі прыгожую школьную форму – сарафаны і касцюмы для дзяўчынак і элегантныя касцюмы для хлопчыкаў і юнакоў.

Мадэлі спадабаліся. Але ўзніклі сумненні: як усяму класу набыць касцюмы адной мадэлі і колеру? Аказалася, што з гэтым ніякіх праблем у бацькоў не ўзнікне: у вызначаны дзень спецыялісты фабрыкі прыязджаюць у школу, робяць абмеры дзяцей, вызначаюцца з тканінай і мадэлямі, а потым шыюць і рэалізоўваюць прадукцыю бацькам без гандлёвай нацэнкі.

Былі прадстаўлены на бацькоўскім сходзе і мадэлі адзення, якія вырабляе «Калінка» – новыя калекцыі, а таксама мінулагоднія можна набыць у фірменным магазіне прадпрыемства, які працуе ў Астраўцы ў гандлёвым цэнтры «Талер». Вытворцы паабяцалі, што асартымент адзення будзе шырокі – гэтаксама, як і памерная група.

Зразумела, што арганізатараў мерапрыемства цікавілі адносіны дзяцей і дарослых да ўвядзення школьнай формы ў навучальных установах. Усе пагадзіліся, што школьная форма – гэта зручна і прыгожа. быць. Толькі чамусьці, як і раней, юнакі і дзяўчаты старэйшых класаў аддаюць перавагу джынсам – і не жадаюць хадзіць у дзелавых касцюмах.

Што ж датычыцца прапаноў фабрык, то не выкарыстаць іх будзе не рацыянальна. Як у такім выпадку паступяць бацькі і іх дзеці – убачым 1 верасня.

Алена СВЕТЛАЯ, фота аўтара.