"Последний звонок" в Гервятской школе искусств
У Гервяцкім філіяле Астравецкай дзіцячай школы мастацтваў прайшло свята апошняга званка.
У актавай зале сабраліся бацькі, вучні, настаўнікі і госці. Выконваючая абавязкі загадчыцы філіяла Алена Сцефановіч павіншавала выпускнікоў, словы падзякі былі адрасаваны бацькам выпускніцы Яны Шаблаўскайце, якая скончыла школу мастацтваў з адзнакай.
Ад імя бацькоў выпускнікоў Марыя Сцефановіч пранікнёна высказала словы падзякі настаўнікам Людміле Анікевіч, Алене Сцефановіч, Алене Субач, Святлане Піменавай, якія не толькі вучылі, але і прывівалі любоў да музыкі, выхоўвалі, развівалі і ўзбагачалі духоўны мір сваіх вучняў.
А потым пачалася канцэртная праграма. Новы танец “Валенкі” паказалі маленькія артысты харэаграфічнага класа – і гэта ўзняло настрой гледачам і ажывіла іх. Добрае ўражанне пакінула трыа баяністаў пад кіраўніцтвам Людмілы Анікевіч. Юныя піяністкі Рэната Субач і Аляксандра Сыс прафесійна выканалі знаёмыя мелодыі з кінафільмаў. Ярка і віртуозна гучалі “Беларуская полька” ў выкананні Таццяны Мілейша і “Калінка”, якую сыграла Дар’я Жусін. У заключнай часцы канцэрта прагучалі музычныя падарункі ад выпускнікоў: Уладзіслаў Лукша і Яна Шаблаўскайце выканалі народныя песні, Дзмітрый Сцефановіч сыграў “Фінскі танец”, а Юрый Кавалеўскі – “Соперницы”.
--------------------------------------------
Люцыя ПАЗЛЕВІЧ,
бібліятэкар Гервяцкай бібліятэкі.